బంగారం బేజారు.. వెండి జోరు! సోమవారం మార్కెట్ ట్రెండ్ ఇదే

అంతర్జాతీయ మార్కెట్‌లో వరుసగా జరుగుతున్న పరిణామాలు పెట్టుబడిదారుల్లో తీవ్ర ఆందోళనను కలిగిస్తున్నాయి. గ్రీన్‌లాండ్‌ను తమ ఆధీనంలోకి తీసుకోవాలనే అంశంపై అమెరికా అధ్యక్షుడు డొనాల్డ్ ట్రంప్ చేస్తున్న సంచలన వ్యాఖ్యలు ప్రపంచ మార్కెట్లను కుదిపేస్తున్నాయి. ఈ పరిణామాల ప్రభావంతో స్టాక్ మార్కెట్లు ఒడిదుడుకులకు లోనవడంతో, ఇన్వెస్టర్లు తమ పెట్టుబడులను భద్రంగా నిలుపుకోవడానికి బంగారం, వెండి, ప్లాటినం వంటి విలువైన లోహాల వైపు మొగ్గు చూపుతున్నారు. ఈ నేపథ్యంలో సోమవారం ఉదయం వెండి ధరలు ఒక్కసారిగా భారీగా పెరిగి మార్కెట్‌ను ఆశ్చర్యానికి గురి చేశాయి. ప్రస్తుతం బంగారంతో పోలిస్తే వెండిపై డిమాండ్ గణనీయంగా పెరగడంతో వెండి ధరలు చరిత్రలోనే ఎన్నడూ లేని గరిష్ట స్థాయికి చేరాయి.సోమవారం రీటైల్ మార్కెట్‌లో కిలో వెండి ధర ఒక్క రోజులోనే రూ.8,000 పెరిగి రూ.3,18,000కు చేరడం ఆల్‌టైమ్ రికార్డ్‌గా నమోదైంది. అదే విధంగా మల్టీ కమోడిటీ ఎక్స్ఛేంజ్ (MCX)లో కూడా వెండి ధర తొలిసారి రూ.3 లక్షల మార్కును దాటి రూ.3,01,315 వద్ద ట్రేడైంది.వెండి ధరల పెరుగుదలకు ప్రధాన కారణంగా అమెరికా అధ్యక్షుడు ట్రంప్ ఐరోపా దేశాలపై కొత్త వాణిజ్య పన్నులు విధిస్తామని ప్రకటించడాన్ని విశ్లేషకులు పేర్కొంటున్నారు. గ్రీన్‌లాండ్ అంశంలో అమెరికాకు వ్యతిరేకంగా ఉన్న దేశాలపై ఫిబ్రవరి 1 నుంచి 10 శాతం పన్ను విధిస్తామని, జూన్ నాటికి ఆ పన్నును 25 శాతానికి పెంచుతామని ట్రంప్ హెచ్చరించారు. దీనికి ప్రతిగా ఐరోపా దేశాలు కూడా అమెరికాతో ఉన్న వాణిజ్య ఒప్పందాలను రద్దు చేసుకుంటామని, అవసరమైతే సైనిక చర్యలకు సిద్ధమని హెచ్చరించడంతో ప్రపంచవ్యాప్తంగా ‘ట్రేడ్ వార్’ భయం నెలకొంది.వెండితో పాటు బంగారం ధరల్లోనూ పెరుగుదల కనిపించింది. అంతర్జాతీయ మార్కెట్‌లో స్పాట్ గోల్డ్ ధర 1.6 శాతం పెరిగి ఔన్సుకు 4,691 డాలర్ల స్థాయికి చేరింది. ఇదే ప్రభావంతో దేశీయ మార్కెట్లలోనూ బంగారం ధరలు ఎగబాకాయి. చెన్నై, హైదరాబాద్ మార్కెట్లలో 10 గ్రాముల 24 క్యారెట్ల బంగారం ధర రూ.1,860 పెరిగి రూ.1,46,730కు చేరగా, 22 క్యారెట్ల బంగారం ధర రూ.1,700 పెరిగి రూ.1,34,500గా నమోదైంది.