శిక్ష ముగిసి 3 ఏళ్లయినా పాకిస్తాన్ జైలులోనే భారత మత్స్యకారుడు.. అనారోగ్యంతో అక్కడే మృతి

పాకిస్తాన్ జైళ్లలో భారతీయ మత్స్యకారుల దుస్థితికి నిదర్శనంగా మరో విషాదకర ఘటన వెలుగులోకి వచ్చింది. శిక్షాకాలం ముగిసి 3 ఏళ్లు గడుస్తున్నా.. స్వదేశానికి తిరిగి రాలేక గుజరాత్‌కు చెందిన ఓ మత్స్యకారుడు కరాచీ జైలులోనే ప్రాణాలు విడిచాడు. పొరపాటున అంతర్జాతీయ సముద్ర సరిహద్దు దాటి పాకిస్తాన్ అధికారులకు చిక్కాడు. కరాచీలోని మలీర్ జైలులో జనవరి 16వ తేదీన మరణించాడు. గుజరాత్‌లోని గిర్ సోమనాథ్ జిల్లా ఉనాకు చెందిన వ్యక్తిగా భావిస్తున్న ఈ మత్స్యకారుడు.. గత కొన్ని నెలలుగా అనారోగ్యంతో బాధపడుతున్నట్లు తెలుస్తోంది.

నిబంధనల ఉల్లంఘన

శాంతి కార్యకర్త జతిన్ దేశాయ్ వెల్లడించిన వివరాల ప్రకారం.. సదరు మత్స్యకారుడిని 2022లో పాక్ ఏజెన్సీలు బంధించాయి. అదే ఏడాది అతని శిక్షాకాలం ముగిసింది. అతని జాతీయతను కూడా గుర్తించారు. 2008లో భారత్-పాక్ మధ్య జరిగిన కన్సులర్ యాక్సెస్ ఒప్పందం ప్రకారం.. జాతీయత ధృవీకరణ, జైలు శిక్షాకాలం ముగిసిన ఒక నెలలోపు ఖైదీలను విడుదల చేయాల్సి ఉంటుంది. కానీ ఈ నిబంధనలు కేవలం కాగితాలకు మాత్రమే పరిమితం కావడంతో ఆ మత్స్యకారుడు గత 3 ఏళ్లుగా కరాచీ జైలులోనే మగ్గిపోయి చివరికి అక్కడే కన్నుమూశాడు.

ప్రస్తుతం కరాచీ జైలులో 198 మంది భారతీయ మత్స్యకారులు ఉండగా.. అందులో 160 మందికి పైగా శిక్షాకాలం ఎప్పుడో ముగిసిపోయింది. వీరి విడుదల కోసం మత్స్యకారుల సంఘాలు గత నెలలోనే విదేశీ వ్యవహారాల మంత్రి ఎస్ జైశంకర్‌కు లేఖ కూడా రాశాయి. జైళ్లలో మగ్గుతున్న వారి ఆరోగ్యం క్షీణిస్తోందని.. వారిని తక్షణమే స్వదేశానికి రప్పించాలని కోరాయి.

కుటుంబాల ఆవేదన

సముద్రంలో సరిహద్దులు తెలియక పొరపాటున దారి తప్పి.. పాకిస్తాన్‌లోకి వెళ్లినందుకు ఏళ్ల తరబడి జైలు శిక్ష అనుభవించడం.. శిక్ష కాలం ముగిసినా విడుదల కాకపోవడంపై మత్స్యకార కుటుంబాలు తీవ్ర ఆందోళన వ్యక్తం చేస్తున్నాయి. మరణించిన మత్స్యకారుడి భౌతిక కాయాన్ని భారత్‌కు రప్పించేందుకు ప్రస్తుతం ప్రయత్నాలు జరుగుతున్నాయి. ఈ ఘటన జరిగిన తర్వాత అయినా.. కరాచీ జైలులో ఇలాంటి స్థితిలో ఉన్న మిగిలిన భారత మత్స్యకారులను వెనక్కి రప్పించాలని కోరుతున్నారు.