షాంపూతో స్నానం వల్ల మీ జట్టు ఊడకుండా ఉండాలంటే ఈ చిట్కా పాటించండి

ప్రతి ఒక్కరి అందంలో జుట్టుదే ప్రధాన పాత్ర. అందుకే ప్రతి ఒక్కరూ జుట్టు నల్లగా, పొడుగ్గా ఉండాలని కోరుకుంటారు. అయితే, ఈ రోజుల్లో జుట్టు రాలడం ప్రధాన సమస్యగా మారింది. చిన్నా, పెద్దా తేడా లేకుండా చాలా మంది ఈ సమస్యను ఎదుర్కొంటున్నారు. ముఖ్యంగా యువత ఈ సమస్యతో ఆందోళన ఎక్కువగా చెందుతున్నారు. జుట్టు రాలి ఎక్కడ బట్టతల వస్తుందేమా అన్న ఆందోళన వారిలో కనిపిస్తుంది.

ఇక, జుట్టు రాలడం ఆపడం కోసం చాలా మంది అనేక రకాల షాంపూలు, మార్కెట్లో దొరికే ప్రొడక్ట్స్ వాడుతున్నారు. వీటి వల్ల కూడా అనుకున్నంత ఫలితం ఏం కనిపించడం లేదు. ఇవి వాడుతున్నా జుట్టు రాలడం ఆగడం లేదు. అయితే, జుట్టు రాలడం వెనక అనేక కారణాలు ఉండొచ్చు. అంతేకాకుండా మన అలవాట్లు కూడా ఓ కారణమంటున్నారు బ్యూటీ ఎక్స్‌పర్ట్, కంటెంట్ క్రియేటర్ వంశిత. షాంపూతో తలస్నానం చేసే ముందు ఒక పని చేయడం చాలా మంది మర్చిపోతుంటారు. ఆ పని వల్లే జుట్టు రాలడం ఎక్కువగా ఉంటుందని ఆమె చెబుతున్నారు. ఇంతకీ ఆ పని ఏంటో ఇప్పుడు తెలుసుకుందాం.

మన జుట్టును ఎలా చూసుకోవాలి?

ఉదయపూర్‌కి చెందిన వంశిత కంటెంట్ క్రియేటర్. ఆమె ఎక్కువగా బ్యూటీ, ఫ్యాషన్ విషయాలపై ఎక్కువగా కంటెంట్ క్రియేట్ చేస్తుంటారు. ఇందులో ఆమె ఎక్స్‌పర్ట్ అని బయోలో ఉంది. ఇక, తలస్నానం చేయడానికి, జుట్టు సంరక్షణకు సరైన మార్గాన్ని వివరిస్తూ తన ఇన్‌స్టాగ్రామ్ ఖాతాలో ఓ వీడియోను షేర్ చేశారు.

వంశిత ప్రకారం జుట్టు రాలడానికి మనం చేసే కొన్ని తప్పులే కారణం. కొన్ని అలవాట్లు జుట్టును బలంగా మార్చడానికి, మెరిసేలా చేయడానికి, పొడుగ్గా ఉంచడానికి సాయపడతాయి.

షాంపూతో తలస్నానం చేసుకునేముందు చేయాల్సిన ఒక పని

​చాలా మంది తలస్నానానికి ముందు ఓ పొరపాటు చేస్తుంటారు. తలస్నానం చేసే ముందు జుట్టు దువ్వుకోరు. అయితే, షాంపూతో తలస్నానానికి ముందు జుట్టును సరిగ్గా చిక్కులు లేకుండా చూసుకోవడం ముఖ్యం. లేదంటే జుట్టు బలహీనపడి విరిగిపోతుంది.

ఖచ్చితంగా షాంపూతో తలస్నానం చేసేముందు దువ్వుకోలాని వంశిత సూచిస్తున్నారు. మీరు కావాలనుకుంటే నూనె అప్లై చేసి జుట్టును చిక్కులు లేకుండా చేయండి. చిక్కుబడ్డ జుట్టును షాంపూతో వాష్ చేసుకోవడం వల్ల ఎక్కువగా చిట్లుతుంది. అంతేకాకుండా జుట్టు రాలడం ఎక్కువగా ఉంటుంది.

షాంపూతో తలస్నానానికి ముందు చేయాల్సిన పని

ఎంత తరచుగా షాంపూ చేసుకోవాలి?

చాలా మంది ఎక్కువసార్లు తలస్నానం చేస్తుంటారు. అయితే, ఇది కరెక్ట్ పద్ధతి కాదంటున్నారు నిపుణులు. వారానికి రెండు సార్లు తలస్నానం చేస్తే మంచిదని వంశిత చెబుతున్నారు. తలస్నానం చేయడానికి కూడా ఓ పద్ధతి ఉంటుంది. ముందుగా షాంపూని డైరెక్టుగా తలకు అప్లై చేసుకోండి. కొంచెం చేతిలోకి తీసుకుని కొద్దిగా నీళ్లు కలిపి జుట్టుకు అప్లై చేయండి.

ఆ తర్వాత మసాజ్ చేసి.. ఆపై నీటితో వాష్ చేసుకోవాలి. ఆ తర్వాత కొంచెం ఎక్కువ షాంపూ తీసుకుని ఇదే పద్దతి ఫాలో అవ్వాలి. ఈ సారి నురుగు ఎక్కువగా వస్తుంది. బాగా వాష్ చేసుకున్న తర్వాత జుట్టును శుభ్రంగా ఉంచుకోండి.రెండోసారి షాంపూ చేసినప్పుడు పూర్తిగా మురికి తొలగిపోతుందని ఆమె చెబుతున్నారు.

కండీషనర్ ఎలా అప్లై చేయాలి?

కండిషనర్ అప్లై చేయడానికి, మీరు మొదట షాంపూతో బాగా తలస్నానం చేయాలి. ఆ తర్వాత కండిషనర్ అప్లై చేసి, దానిని మీ జుట్టుకు సున్నితంగా రుద్ది, 1 నిమిషం పాటు అలాగే ఉంచండి. తర్వాత, నీటితో బాగా కడిగేయండి. ఇలా చేయడం వల్ల కండిషనర్ తలకు చేరుకుని మీ జుట్టును శుభ్రపరుస్తుంది. అంతేకాకుండా తడి జుట్టును ముడి వేసుకోకండి. ఇలా చేయడం వల్ల జుట్టు రాలిపోతుంది. బాగా ఆరబెట్టిన తర్వాతే జుట్టును ముడి వేసుకోవాలి.

ఈ విషయాలు కూడా ముఖ్యం

జుట్టు రాలడం తగ్గడానికి ఆహారంపై ప్రత్యేక శ్రద్ధ తీసుకోవాలి. ప్రోటీన్లు, విటమిన్ ఎ,సి, డి, ఈ, ఐరన్, జింక్ అధికంగా ఉండే పోషకాహారం తీసుకోవాలి.

సమతుల్య ఆహారం కోసం పాలకూర, గుడ్లు, చేపలు, తృణధాన్యాలు, నట్స్, చియా సీడ్స్, గుమ్మడి గింజల్ని మీ ఆహారంలో భాగం చేసుకోండి.

జుట్టుకు కూడా హైడ్రేషన్ ముఖ్యం. ఇందుకోసం తగినంత నీరు తీసుకోవడం చాలా ముఖ్యం. లేదంటే జుట్టు పొడిబారి రాలిపోతుంది.

ఒత్తిడి వల్ల జుట్టు రాలడం ఎక్కువగా ఉంటుంది. ఒత్తిడి తగ్గించుకోవడానికి యోగా, ధ్యానం వంటివి లైఫ్‌స్టైల్‌లో భాగం చేసుకోండి.

కొబ్బరి నూనె లేదా ఆముదంతో తలకు బాగా మసాజ్ చేసుకోండి. దీంతో రక్త ప్రసరణ మెరుగుపడుతుంది. జుట్టు రాలడం తగ్గుతుంది.