తల్లి పెంపకంలో పెరిగితే పిల్లలకు తండ్రి ఇంటిపేరు అక్కర్లేదు: బాంబే హైకోర్టు సంచలన తీర్పు

భారతీయ పితృస్వామ్య సమాజంలో బిడ్డ గుర్తింపునకు తండ్రి పేరో, ఇంటిపేరో తప్పనిసరిగా పెట్టాలనే సంప్రదాయానికి బాంబే హైకోర్టు గండికొట్టింది. కేవలం తల్లి సంరక్షణలోనే పెరిగిన బిడ్డకు తండ్రి ఇంటి పేరుతో గానీ, ఆయన కులంతో గానీ ఎలాంటి అవసరం లేదని న్యాయస్థానం స్పష్టం చేసింది. ఒంటరి తల్లుల పోరాటాలకు గుర్తింపును ఇస్తూ.. బిడ్డ భవిష్యత్తుకు తల్లి గుర్తింపే ప్రాతిపదిక కావాలని చారిత్రాత్మక తీర్పు వెలువరించింది. ముఖ్యంగా తల్లి సంరక్షణలోనే పెరిగిన పిల్లలకు ఆమె ఇంటి పేరుతో పాటు ఆమె కులాన్నే ఇవ్వాలని తేల్చి చెప్పింది.

అసలేమిటీ కేసు..?

ఈ కేసు వివరాల్లోకి వెళ్తే.. ఒక 12 ఏళ్ల బాలిక తన పాఠశాల రికార్డుల్లో తన గుర్తింపునకు సంబంధించి మార్పులు చేయాలని కోరుతూ న్యాయస్థానాన్ని ఆశ్రయించింది. అయితే ఆ బాలిక పుట్టినప్పటి నుంచి కేవలం తన తల్లి పెంపకంలోనే పెరుగుతోంది. ఈ నేపథ్యంలోనే పాఠశాల దస్త్రాలలో ఉన్న తన తండ్రి ఇంటి పేరును, అలాగే ఆయన కులం పేరును పూర్తిగా తొలగించాలని ఆమె విన్నవించింది. వాటి స్థానంలో తనను సాకుతున్న తల్లి ఇంటి పేరును, తల్లి కులాన్ని నమోదు చేయాలని కోరింది.

ఈ పిటిషన్‌ను విచారించిన జస్టిస్ విభా కన్‌కన్‌వాడి, జస్టిస్ హితేన్ వెనెగావ్కర్‌లతో కూడిన ధర్మాసనం బాలిక విన్నపాన్ని సమర్థించింది. ఒక తల్లి సింగిల్ పేరెంట్‌గా ఉంటూ బిడ్డను పోషిస్తున్నప్పుడు.. ఆమెకు ఉన్న ఇంటి పేరు, కులమే ఆ బిడ్డకు కూడా చట్టబద్ధంగా వర్తిస్తాయని న్యాయస్థానం తేల్చిచెప్పింది. పాఠశాల రికార్డుల నుంచి తండ్రి పేరు, కులం వివరాలను తక్షణమే తొలగించాలని ఆదేశించింది. వాటి స్థానంలో తల్లి వివరాలను నమోదు చేయాలని అధికారులకు స్పష్టంగా చెప్పింది.

ఈ తీర్పు కేవలం ఒక బాలికకు సంబంధించినది మాత్రమే కాదని.. సమాజంలో ఎంతోమంది ఒంటరి తల్లులు ఎదుర్కొంటున్న గుర్తింపు సమస్యలకు ఇది శాశ్వత పరిష్కారాన్ని చూపుతుందని నిపుణులు చెబుతున్నారు. బిడ్డ సంరక్షణలో ఎలాంటి పాత్ర పోషించని తండ్రి పేరును మోయాల్సిన అవసరం లేదని కోర్టు చెప్పడం ద్వారా స్త్రీ సాధికారతకు, మాతృత్వపు హక్కులకు పెద్దపీట పడిందంటూ హర్షం వ్యక్తం చేస్తున్నారు. మరి ఈ తీర్పును మీకు ఎలా అనిపిస్తుందో కామెంట్ల రూపంలో వెల్లడించేయండి.