'ఇరాన్‌పై దాడుల కోసం మా సైనిక స్థావరాలు కూడా అమెరికా వాడుకోవచ్చు': కీర్ స్టార్మర్

పశ్చిమాసియాలో ముదురుతున్న యుద్ధ మేఘాల మధ్య బ్రిటన్ కీలక నిర్ణయం తీసుకుంది. ఇరాన్ నుంచి దూసుకొస్తున్న క్షిపణులను అడ్డుకునేందుకు, ఆ దేశంలోని క్షిపణి నిల్వ కేంద్రాలు, లాంచర్లపై అమెరికా జరిపే దాడులకు తమ సైనిక స్థావరాలను వాడుకోవడానికి బ్రిటన్ ప్రధాని కియర్ స్టార్మర్ అనుమతిని ఇచ్చారు. ఈ మేరకు ఆదివారం ఆయన సామాజిక మాధ్యమం ఎక్స్ వేదికగా ఒక వీడియో సందేశాన్ని విడుదల చేస్తూ.. ఈ నిర్ణయం వెనుక ఉన్న కారణాలను వివరించారు.

రక్షణ కోసమే ఈ సహకారం..

ఇరాన్ క్షిపణుల ముప్పు నుంచి ఈ ప్రాంతాన్ని కాపాడటం కోసం అమెరికా చేసిన విజ్ఞప్తిని తాము మన్నించామని స్టార్మర్ పేర్కొన్నారు. "ఇరాన్ తన క్షిపణులను ప్రయోగించకుండా అడ్డుకోవడమే మా ప్రధాన ఉద్దేశ్యం. ఇది కేవలం రక్షణార్థం తీసుకున్న పరిమిత నిర్ణయం మాత్రమే" అని ఆయన స్పష్టం చేశారు. ఇరాన్ ప్రయోగిస్తున్న క్షిపణులు ప్రస్తుతం ఈ ప్రాంతంలోని హోటళ్లు, విమానాశ్రయాలను తాకుతున్నాయని.. అక్కడ బ్రిటన్ పౌరులు నివసిస్తున్న విషయాన్ని ఆయన గుర్తు చేశారు.

 దాడుల్లో నేరుగా పాల్గొనబోము.. కానీ!

శనివారం ఇరాన్ సుప్రీం లీడర్ అలీ ఖమేనీ హతమైన అమెరికా-ఇజ్రాయెల్ ఉమ్మడి దాడుల్లో బ్రిటన్ నేరుగా పాల్గొనలేదని ప్రధాని స్టార్మర్ మరోసారి స్పష్టం చేశారు. అలాగే భవిష్యత్తులో జరగబోయే దాడుల్లో కూడా బ్రిటన్ నేరుగా భాగస్వామి కాబోదని తేల్చి చెప్పారు. అయితే గల్ఫ్ ప్రాంతంలోని తమ మిత్రదేశాలు భద్రత కోసం బ్రిటన్‌ను సహాయం కోరుతున్నాయని.. వారిని కాపాడటంతో పాటు బ్రిటన్ పౌరుల ప్రాణరక్షణ తన ప్రథమ కర్తవ్యమని ఆయన ఉద్ఘాటించారు.

మూలాలను దెబ్బతీయడమే మార్గం

బ్రిటన్ యుద్ధ విమానాలు ఇప్పటికే ఇరాన్ క్షిపణులను గాలిలోనే అడ్డుకుంటున్నాయని, అయితే కేవలం క్షిపణులను అడ్డుకోవడం వల్ల ముప్పు తప్పదని స్టార్మర్ విశ్లేషించారు. "క్షిపణులు ప్రయోగించే ముందే వాటిని నిల్వ కేంద్రాలలో లేదా లాంచర్ల వద్దే ధ్వంసం చేయడం ద్వారానే శాశ్వత పరిష్కారం లభిస్తుంది. అందుకే అమెరికాకు మా స్థావరాలను వాడుకునేందుకు అనుమతి ఇచ్చాము" అని ఆయన వివరించారు. ఇరాన్ అణు ఆకాంక్షలను వీడి.. చర్చల ద్వారా సమస్యను పరిష్కరించుకోవాలని తాము కోరుకుంటున్నప్పటికీ, ఇరాన్ దాడులు కొనసాగిస్తుండటం వల్ల ఈ 'ఆత్మరక్షణ' చర్య తప్పలేదని స్టార్మర్ తన సందేశంలో పేర్కొన్నారు.