ట్రెండింగ్
ఉప్పొంగిన వాగులు.. హర్షించిన శనగరైతులు..
Andhra Pradesh Telugu | Suryaa Desk | Published : Wed, Sep 25, 2019, 04:27 PM
రాయలసీమ వ్యాప్తంగా కురుస్తున్న భారీ వర్షాలతో ఓ వైపు వాగులు , వంకలు ఉగ్రరూపం దాలుస్తున్నాయి. ఇటు అనంతపురం జిల్లాలోను ఎడతెరిపి లేకుండా వర్షాలు కురుస్తున్నాయి. జిల్లాలోని ఉరవకొండ మండలంలో తెల్లవారుజాము నుంచి కురుస్తున్న భారీ వర్షానికి చెరువులు, వాగులు పొంగి పొర్లుతున్నాయి. విడపనకల్లు మండలం డోనేకల్లు 63 జాతీయ రహదారిపై వాగు ఉద్ధృతంగా ప్రవహిస్తుండటంతో బళ్లారి-గుంతకల్లుకు మధ్య మూడు గంటల పాటు రాకపోకలు నిలిచిపోయాయి. అయితే ఈ వర్షాలు మాత్రం తమకు ఎంతో ఉపయోగకరమైనవని చెపుతున్నారు శనగ పండిస్తున్న రైతులు. రబీ సీజన్లో శనగపప్పును సాగు చేసేందుకు ఈ వర్షాలు ఎంతో అనుకూలమని శనగరైతులు హర్షం వ్యక్తం చేస్తున్నారు. అయితే ఎడతెరిపి లేకుండా కురిస్తే మాత్రం నష్టాలు కూడా చవి చూడాల్సి వస్తుందని చెపుతున్నారు.
|
|