ఏపిలో కాంగ్రెస్ మ‌ళ్లీ చిగురించేనా?

.ఒక‌ప్పుడు కేంద్రంలో చ‌క్రం తిప్పాలంటే హ‌స్తం పార్టీ కోటి ఆశ‌ల‌తో  ఆంధ్ర‌ప్ర‌దేశ్ వైపు చూసేది. వందేళ్ల కాంగ్రెస్ ప‌ని అయిపోయిన‌ట్లే అనుకున్న ప్ర‌తిసారి ప్రాణం పోసేందుకు ఏపీ ప్ర‌జ‌లు ఉన్నార‌నే ధైర్యం ఇందిర‌మ్మ నుంచి సోనియాగాంధీ వ‌ర‌కూ క‌నిపించేది కూడా. అంత‌గా నెత్తిన పెట్టుకుని మోసిన ప్ర‌జ‌లు  ఆంధ్ర‌ప్ర‌దేశ్ విభ‌జ‌న పాపం సోనియాగాంధీదే అని న‌మ్మ‌కం. ఇంత త‌ప్పు చేసిన కాంగ్రెస్‌ను మేం న‌మ్మమంటూ త‌మ ఓట్ల‌తో చెప్ప‌టం 2014తో ప్రారంభించి, హ‌స్తం అంటే ఛీ కొడుతున్నారు. . రాష్ట్ర విభ‌జ‌న‌తో ఇటు తెలంగాణ‌లో లాభ‌ప‌డాల‌ని భావించిన కాంగ్రెస్‌ను అక్క‌డ కూడా వీసెమెత్తు బ‌లం అందుకోలేదు స‌రిక‌దా... తెలంగాణ తెచ్చింది కేసీఆర్ అనే భావ‌న‌తో జ‌న‌మంతా అటువైపే మొగ్గారు.  కానీ.. 2018 ముంద‌స్తు ఎన్నిక‌ల్లో హ‌స్తం పార్టీ తెలంగాణ‌లో కొంత‌ జీవం పోసుకున్నా.. మ‌హాకూట‌మి పేరిట టీడీపీతో పొత్తు.. సీట్ల రాజ‌కీయాలు చివ‌ర‌కు అధికారానికి దూరం చేసిందన్న‌ది య‌దార్ధం.  దాని ప్ర‌భావం2019 ఎన్నిక‌ల్లో టీడీపీ పై ప‌డింది.  ఇన్నాళ్లు వ్య‌తిరేకించిన కాంగ్రెస్‌తో  టీడీపీ స్నేహం చేయ‌టం రాజ‌కీయ అవ‌స‌రంగా నేత‌లు భావించినా, జ‌నం మాత్రం దానిని జీర్ణించుకోలేక పోయార‌న్న‌దీ నిజం.  

అటువంటి కాంగ్రెస్‌కు ఇప్పుడు ఏపీలో నాయ‌క‌త్వ‌మే పెద్ద‌ స‌మ‌స్య‌గా మారింది.  విభ‌జ‌న వ్య‌తిరేకించి సొంత కుంప‌టి పెట్టుకున్న మాజీ సీఎం కిర‌ణ్‌కుమార్‌రెడ్డి మ‌ళ్లీ హ‌స్తం కండువా క‌ప్పుకున్నా దూరంగా ఉండ‌గా. పీసీపీ అధ్య‌క్షుడుగా ఉన్న‌ర‌ఘువీరారెడ్డి  అనూహ్యంగా త‌న ప‌ద‌వికి రాజీనామా చేశారు. ఇప్పుడు అక్క‌డ నాయ‌క‌త్వం ఎవ‌రు వ‌హిస్తార‌నేది ఆస‌క్తిగా మారింది.
ఏదో పార్టీ ప‌ద‌వి క‌నీస గౌర‌వం ద‌క్కుతుంద‌నే ఆశ‌తో మాజీ మంత్రి ఎస్. శైల‌జానాథ్‌, మాజీ ఎంపీ చింతా మోహ‌న్‌, మ‌హిళా నేత సుంక‌ర ప‌ద్మ‌శ్రీ పిసిసి పీఠం కోసం పోటీలో ఉన్నారు. మ‌రి వీరిలో ఎవ‌రికి ప‌ట్టం క‌డ‌తార‌నేది ఆస‌క్తిగా మారింది. వీరిలో ఎవ‌రు తిరిగి ఏపీలో కాంగ్రెస్‌కు పున‌ర్‌వైభ‌వం తీసుకువ‌చ్చే స్థాయిలో వీరికి ప్ర‌జ‌ల్లో పెద్ద‌గా ఇమేజ్ లేదంటున్నాయి కాంగ్రెస్ శ్రేణులు. మ‌రి దీన్ని ఎలా అధిగ‌మించి హ‌స్తం ఏపీలో అధికారం సాధించే దిశ‌గా అడుగులు వేస్తార‌నేది సోనియ‌మ్మ‌కే తెలియాలి.