శశికళకు వీఐపీ ట్రీట్‌మెంట్...రూప రిపోర్ట్ కరెక్టే!

అక్రమాస్తుల కేసులో ప్రధాన దోషిగా ఉన్న అన్నాడీఎంకే ప్రధాన కార్యదర్శి వీకే శశికళ బెంగళూరు పరప్పన అగ్రహారం జైల్లో ప్రత్యేక సదుపాయాలను కల్పించారని, దీనికి ఆమె రూ.2 కోట్ల లంచం ఇచ్చినట్లు డీఐజీ రూప బయటపెట్టిన విషయం తెలిసిందే. దీనిపై కర్ణాటక అసెంబ్లీ ప్రజా పద్దుల కమిటీ ముందు హాజరైన జైళ్లశాఖ సీనియర్ అధికారులు, శశికళకు వీఐపీ ట్రీట్ మెంట్ నిజమేనని, ఈ విషయంలో డీఐజీ రూప నివేదికలో వాస్తవాలు ఉన్నాయని వెల్లడించారు. ఆమెతోపాటు కోట్లాది రూపాయల విలువైన స్టాంపుల కుంభకోణంలో దోషి అబ్దుల్ కరీమ్ తెల్గీకి కూడా ప్రత్యేక సదుపాయాలను కల్పించినట్టు అంగీకరించారు.

బీజేపీ ఎమ్మెల్యే, మాజీ హోమ్ మంత్రి ఆర్ అశోక్ అధ్యక్షుడిగా ఉన్న ప్రజా పద్దుల సంఘం, 15 రోజుల్లోగా రూప చేసిన ఆరోపణలపై నివేదిక ఇవ్వాలని జైలు అధికారులను ఆదేశించారు. దీంతో జైలు అధికారులు స్వయంగా హాజరై ఈ నివేదికను పీఏసీకి సమర్పించారు. ఈ నెల 10న డీఐజీ రూప మౌడ్గిల్ ఇచ్చిన నివేదిక సంచలనం సృష్టించిన‌ సంగతి తెలిసిందే. జయలలిత అక్రమాస్తులు కేసులో సుప్రీంకోర్టు ప్రధాన దోషిగా పేర్కోవడంతో గత ఫిబ్రవరి 15 న జైలు వెళ్లారు. జైల్లో ఆమెను సాధారణ ఖైదీగా పరిగణించాలన్న కోర్టు ఆదేశాలను బేఖాతరు చేస్తూ ప్రత్యేక ఆహారం తయారీ కోసం వంటగాళ్లు, వంటగది, మరో ఐదు గదులు, ఖరీదైన దుస్తులు తదితర ఎన్నో సౌకర్యాలు కల్పించినట్లు రూప పేర్కొన్నారు.

అలాగే తెల్గీకి ప్రత్యేక సదుపాయాల్లో భాగంగా, బాడీ మసాజ్ కోసం నలుగురు ఖైదీలను నియమించినట్లు జైలు అధికారులు తమ రిపోర్టులో పేర్కొన్నారు. ఈ నివేదికను మీడియా ముందు బహిర్గతం చేసిన డీఐజీ రూప నిబంధనలను ఉల్లంఘించారని పేర్కొంటూ ఆమెను ట్రాఫిక్ విభాగానికి బదిలీ చేశారు. పరప్పన అగ్రహార జైల్లో శశికళ ఉండటం లేదని, సమీపంలోని ఓ లగ్జరీ అపార్టుమెంటులో ఆమె నివసిస్తున్నట్టు తనకు సమాచారం ఉందని రూప ఓ తమిళ పత్రికు ఇచ్చిన ఇంటర్వ్యూలో పేర్కొన్నారు. తమిళ పత్రిక 'తమిళ్‌ మురసు'కు ఇచ్చిన ఇంటర్వ్యూలో రూప ఈ విషయాన్ని బయటపెట్టారు. అపార్టుమెంటు విషయం తనకు తెలిసి, రెడ్ హ్యాండెడ్ గా పట్టుకోవాలని ఎన్నోసార్లు ప్రయత్నించానని, కానీ వీలుపడలేదని ఆమె అన్నారు. శశికళ స్వయంగా పట్టుబడి ఉంటే తాను తీసుకునే చర్యలు భయంకరంగా ఉండేవని పేర్కొన్నారు. తన అరోపణలు రుజువైతే, శశికళకు ప్రస్తుతం విధించిన నాలుగేళ్ల శిక్షకు అదనంగా మరికొన్నేళ్లు శిక్ష తప్పదని తెలిపారు.