కష్టమైనా, భారమైనా పరీక్షలు నిర్వహిస్తాం: సీఎం జగన్
Andhra Pradesh Telugu | Suryaa Desk | Published : Wed, Apr 28, 2021, 03:45 PM
రాష్ట్రంలో ప్రతి విద్యార్థి భవిష్యత్కు భరోసా కల్పిస్తామని ఆంధ్రప్రదేశ్ ముఖ్యమంత్రి జగన్ అన్నారు. రాష్ట్రంలో పది, ఇంటర్ పరీక్షల నిర్వహణపై బుధవారం ముఖ్యమంత్రి స్పందించారు. పది, ఇంటర్ పరీక్షల పై పలువురు విమర్శలు చేస్తున్నారని విపత్కర సమయంలోనూ అగ్గిపెట్టాలని చూస్తున్నారని మండిపడ్డారు. విద్యార్థుల భవిష్యత్ సర్టిఫికెట్లపైనే ఆధారపడి ఉంటుందని పరీక్షల నిర్వహణకు అన్ని రాష్ట్రాల్లో ఒకే విధానం లేదని జగన్ అన్నారు. పరీక్షలు నిర్వహించాలో వద్దో కేంద్రం రాష్ట్రాలకే వదిలేసిందని వివరించారు.
పరీక్షలు నిర్వహించకపోతే సర్టిఫికెట్లలో పాస్ అనే ఉంటుందని, పాస్ సర్టిఫికెట్లతో విద్యార్థులకు మంచి సంస్థల్లో సీట్లు వస్తాయా అని ప్రశ్నించారు. విద్యార్థులకు ఉన్నత భవిష్యత్ ఉండాలనే పరీక్షలు నిర్వహిస్తున్నామని, పరీక్షలు రద్దు చేయాలని చెప్పడం చాలా సులభమైన పనేనని, పరీక్షల నిర్వహణకు అన్ని జాగ్రత్తలు తీసుకుంటున్నామన్నారు. రాష్ట్రంలో ప్రతి విద్యార్థి భవిష్యత్కు భరోసా ఇస్తున్నామని, జాగ్రత్తలతో పరీక్షలు నిర్వహించడం కష్టతరమైన పని అని, కష్టమైనా, భారమైనా పరీక్షలు నిర్వహించాలని నిర్ణయించామన్నారు. ఏ ఒక్క విద్యార్థికీ నష్టం జరగకుండా పరీక్షలు నిర్వహిస్తామని, పరీక్షల నిర్వహణను బాధ్యతగా తీసుకుంటున్నామని ప్రతి విద్యార్థి తల్లిదండ్రులకు భరోసా కల్పిస్తున్నా మని జగన్ అన్నారు.
|
|