వీరికి మాటలు రావు, చెవులు వినిపించవు.. కానీ
national | Suryaa Desk | Published : Tue, Feb 08, 2022, 12:48 PM
సంజు కె.వాల్మీకి, అక్షత ఇద్దరూ ప్రేమించుకుని పెళ్లి చేసుకున్నారు. వీరిద్దరికీ మాటలు రావు. చెవులు వినిపించవు. ఈ ఇద్దరూ పదో తరగతి వరకు కలిసి చదువుకున్నారు. పదో తరగతి తర్వాత ఇద్దరి దారులు వేరయ్యాయి. సంజు కె.వాల్మీకి బెంగళూరులో ఐటీఐ పూర్తి చేసి ఓ ప్రైవేట్ కంపెనీలో జాబ్ చేస్తున్నాడు. వాట్సాప్ ద్వారా సంజు, అక్షత మళ్లీ కాంటాక్ట్ లోకి వచ్చారు. ఇద్దరూ చాటింగ్ చేసుకునేవారు. ఈ క్రమంలో వారిద్దరూ ప్రేమించుకున్నారు. కానీ వారి పెళ్లికి అక్షత కుటుంబం ఒప్పుకోలేదు. సంజు కుటుంబం మాత్రం వారి పెళ్లికి అంగీకరించింది.
ప్రేమికులిద్దరూ జనవరి 29న దావణగెరె జిల్లా రిజిస్ట్రార్ ఆఫీస్లో పెళ్లి చేసుకున్నారు. దీంతో తమ కూతురిని కిడ్నాప్ చేసి పెళ్లి చేసుకున్నాడని అక్షత తల్లిదండ్రులు స్థానిక పోలీస్ స్టేషన్లో సంజుపై ఫిర్యాదు చేశారు. పోలీసులు అక్షత, సంజును స్టేషన్కు పిలిపించి మాట్లాడారు. తాను ఇష్టపూర్వకంగా సంజును పెళ్లి చేసుకున్నానని అక్షత చెప్పింది. దీంతో వారి కథ దాదాపు సుఖాంతమైంది. ఇద్దరూ మేజర్లు కావడంతో పోలీసులు కూడా అక్షత, సంజు ప్రేమ పెళ్లిని ఒప్పుకోక తప్పలేదు. సంజు తండ్రి ఓ ప్రైవేట్ స్కూల్ టీచర్. అక్షతను కన్న కూతురిలా చూసుకుంటామని ఆయన చెప్పారు. పోలీసుల ఎదుట ఇరు కుటుంబాలు రాజీకి రావడంతో ప్రేమ జంటకు ప్రస్తుతానికైతే ఎలాంటి ఇబ్బందులు లేవు.
|
|