నారాయణ కళాశాలలో విద్యార్థిని ఆత్మహత్య
Andhra Pradesh Telugu | Suryaa Desk | Published : Fri, Oct 06, 2017, 01:15 PM
కడపలోని నారాయణ కళాశాలలో ఇంటర్ మొదటి సంవత్సరం చదువుతున్న విద్యార్థిని ఉరివేసుకుని ఆత్మహత్యకు పాల్పడింది. కడప నగరానికి చెందిన మల్లేశ్వర రెడ్డి, శివమ్మ దంపతుల కుమార్తె పావని.. నారాయణ కళాశాలలోని వసతి గృహంలో ఉంటూ ఎంపీసీ మొదటి సంవత్సరం చదువుతోంది. ఈ క్రమంలో పావని గురువారం రాత్రి ఉరివేసుకుంది. అర్ధరాత్రి దాటిన తరువాత గమనించిన తోటి విద్యార్థులు కళాశాల యాజమాన్యానికి తెలియజేశారు. దీంతో వెంటనే వారు పావనిని కడప రిమ్స్కి తరలించగా అప్పటికే ఆమె మృతిచెందినట్లు వైద్యులు నిర్ధారించారు. అనంతరం శవపరీక్ష నిమిత్తం శవాగారానికి తరలించారు. అయితే శవపరీక్ష నిర్వహించడానికి వీల్లేదంటూ పావని కుటుంబసభ్యులు మృతదేహాన్ని తీసుకెళ్లిపోయారు. ఈ నేపథ్యంలో పోలీసులు మార్గమధ్యంలో వారిని అడ్డుకొని మృతదేహాన్ని రిమ్స్కు తరలించారు. దీంతో కొద్దిసేపు అక్కడ ఉద్రిక్తత పరిస్థితులు నెలకొన్నాయి. పావని ఆత్మహత్య చేసుకోవడంపై తమకు అనుమానాలు ఉన్నాయని బంధువులు ఆరోపిస్తున్నారు. ఈ క్రమంలో పోలీసులు కేసు నమోదు చేసి దర్యాప్తు చేపట్టారు.
|
|