చూసేవారికి వణుకు పుట్టించేలా...ఓ సాహస వీరుడి సాహసం

సాహసాలు  చూడాటానికి పనికొస్తాయి గానీ చేసేందుకు మాత్రం గుండె ధైర్యం ఉండాలి. కానీ  ఇక్కడ ఓ వ్యక్తిచేసిన సాహసాన్ని మాత్రం చూడాలంటే ఎంతో గుండె ధైర్యం కావాలి మరి. గిన్నీస్ వరల్డ్ రికార్డ్స్ మనందరికీ నచ్చుతాయి. ఎందుకంటే అవి అత్యంత అద్భుతంగా, చూపు తిప్పుకోనివ్వలేని రేంజ్‌లో ఉంటాయి. కొత్త రికార్డులు నమోదవ్వడమే కాదు... పాత రికార్డులను బ్రేక్ చేస్తున్నారు కొందరు. తద్వారా మరింత సాహసోపేతమైన రికార్డులు నమోదవుతున్నాయి. వారి సాహసాలు, ధైర్యం, పట్టుదల, సంకల్పం ముందు రికార్డులు తలవంచుతున్నాయి. ఆకాశమే హద్దుగా విజయం సాధిస్తున్నారు. ఇప్పుడు మనం చెప్పుకునే రఫాయిల్ జుగ్నో బ్రిడీ  కూడా ఆకాశమే హద్దుగా చెలరేగాడు. 

రఫాయిల్.. మేఘాలకు పైన ఎగురుతున్న రెండు హాట్ ఎయిర్ బెలూన్ల మధ్య తాడును వేలాడ దీసుకొని... ఆ తాడుపై నడుస్తూ వెళ్లాడు. అంత పైన బెలూన్ నుంచి కిందకు చూస్తేనే కళ్లు తిరుగుతాయి. అలాంటి చోట... తాడుపై నడవడం మామూలు విషయమా. పైగా ఆ తాడు కూడా కుదురుగా ఉండదు. రెండు హాట్ బెలూన్ల మధ్య అది ఊగిసలాడుతూ ఉంటుంది. అలాంటి చోట నడక అంటే ప్రాణాలకే ప్రమాదం. కానీ అతను సాధించి చూపించాడు. ఒక బెలూన్ నుంచి మరో బెలూన్‌కి తాడుపై నడుస్తూ వెళ్లాడు.

భూమికి 6,236 అడుగుల ఎత్తులో స్లాక్‌లైన్ వాక్ పాత రికార్డును బ్రేక్ చేశాడు రఫాయిల్. అతను ఈ ఫీట్ చేసిన వీడియో.. ఇన్‌స్టాగ్రామ్‌లోని గిన్నీస్ వరల్డ్ రికార్డ్స్ పేజీలో కొన్ని సెకండ్ల నిడివితోనే ఉంది కానీ.. నెటిజన్లు ఫిదా అయిపోయారు. ఇప్పటికే ఆ వీడియోని 3 రోజుల్లో 76 వేల మందికి పైగా లైక్ చేశారు. "ఇది నమ్మలేని ధైర్యవంతమైన ఫీట్. దీన్ని సాధించడం ద్వారా ప్రపంచంలోనే ఒంటరిగా ఎత్తైన స్లాక్‌లైన్ వాక్ చేసిన వ్యక్తిగా రఫాయిల్ నిలిచాడు" అని గిన్నీస్ వరల్డ్ రికార్డ్ వారు వీడియో క్యాప్షన్‌లో తెలిపారు. బ్రిడీ ఈ ఫీట్‌ని బ్రెజిల్ లోని శాంటా కాటరీనాలో చేశాడు. ప్రపంచంలోనే అతి ఎత్తైన భవనం బుర్జ్ ఖలీఫా కంటే రెట్టింపు ఎత్తులో అతను ఈ నడక సాగించాడు. గాలిలో తేలుతున్న ఫీలింగ్‌ని ఇష్టపడుతూ దీన్ని సాధించాడు. అందుకే నెటిజన్లకు ఈ ఫీట్ బాగా నచ్చింది. "మేము ఆశ్చర్యపోతున్నాం" అని ఓ యూజర్ కామెంట్ ఇవ్వగా... "ఇప్పుడు ఇదీ రికార్డ్" అని మరో యూజర్ స్పందించారు. "దీన్ని చూస్తుంటేనే నా కాళ్లు వణుకుతున్నాయి" అని మరో యూజర్ స్పందించగా... "హాట్సాఫ్" అని నాలుగో యూజర్ మెచ్చుకున్నారు. మీకూ అలాగే అనిపిస్తోందా?