అత్యధిక పెట్రోల్ ధరవున్న జాబితాలో భారత్ మూడో స్థానం

పెట్రోల్ అంటేనే జనం భయపడే పరిస్థితికి వచ్చింది. ప్రభుత్వాలు సామాన్యులకు చుక్కలు చూపిస్తున్నాయి. ప్రపంచ వ్యాప్తంగా పెట్రోల్ ధర అత్యదికంగా ఉన్న దేశాల జాబితాలో మన భారతదేశం మూడో స్థానంలోనున్నది. ధరలు మోత మామూలుగా లేదు. ఎల్‌పీజీ గ్యాస్ సిలిండర్ దగ్గరి నుంచి పెట్రోల్, డీజిల్, చికెన్, నిమ్మకాయలు, వంట నూనె (ఇలా చెప్పుకుంటూ పోతే పెద్ద లిస్టే ఉంది) ధరలు ఆకాశాన్ని తాకాయి. దీంతో జనాలపై చాలా ఎఫెక్ట్ పడుతోంది. ఇక్కడ మీరు ఒక విషయం తెలుసుకుంటే వామ్మో అనుకుంటారు. ఎల్‌పీజీ గ్యాస్ ధర విషయానికి వస్తే.. పీపీపీ పరంగా ప్రపంచంలో కెల్లా భారత్‌లోనే ఎక్కువగా ఉంది.

పెట్రోల్ ధరలో అయితే ప్రపంచంలోనే మూడో స్థానంలో నిలిచింది. డీజిల్ రేటులో అయితే 8వ స్థానంలో ఉన్నాం. దేశీయ మార్కెట్లో కరెన్సీల కొనుగోలు శక్తి (పర్చేజింగ్ పవర్ ఆఫ్ కరెన్సీ) ఆధారంగా చూస్తే ఈ విషయం వెలుగులోకి వచ్చింది. దేశం, కరెన్సీ ప్రాతిపదికన పర్చేజింగ్ పవర్ మారుతుంది. భారతీయులు ఒక లీటరు పెట్రోల్ కొనుగోలు చేయాలంటే సగటున రోజువారీ ఆదాయంలో 1/4 వంతు వెచ్చించాలి. ఇతర దేశాల్లో ఇంత చెల్లించాల్సిన పని లేదు.

ఉదాహరణకు పెట్రోల్ ధర రూ.120గా ఉంది. ఇది 1.58 డాలర్‌కు సమానం అని చెప్పుకోవచ్చు. ఇక్కడ ఒక డాలర్‌ రూ.75.84కు సమానం. అమెరికాలో డాలర్‌న్నరకు లీటరు పెట్రోల్ వస్తుంది. మరో ఉదాహరణ ద్వారా దీన్ని మనం అర్థం చేసుకోవడానికి ప్రయత్నిద్దాం. అమెరికాలో మార్చి నెలలో బంగాళదుంప రేటు కేజీకి 1.94 డాలర్లుగా ఉంది. దీన్ని మన కరెన్సీలోకి మార్చుకుంటే రూ.147 అవుతుంది. ఈ రేటుతో మన దేశంలో ఏకంగా 7 కేజీల బంగాళదుంపలు కొనొచ్చు. అందుకే ఎకనమిస్ట్‌లు దేశీ ధరలను పోల్చడానికి పీపీపీ డాలర్ లేదా ఇంటర్నేషనల్ డాలర్‌ విధానాన్ని తీసుకువచ్చారు. ప్రతి కరెన్సీ దాని మార్కెట్లో ఎంత కొనుగోలు చేయగలదో ఇది తెలియజేస్తుంది. ఇంటర్నేషనల్ మానిటరీ ఫండ్ ప్రకారం పీపీపీ లేదా ఇంటర్నేషనల్ డాలర్ విలువ 2022లో సగటున రూ.22.6గా ఉంది.

ఎల్‌పీజీ ధరల విషయానికి వస్తే.. భారత్‌లో లీటరుకు 3.5 డాలర్లు చెల్లించాల్సి ఉంది. ప్రపంచంలోనే ఇది అత్యధికం. ఇండియా తర్వాతి స్థానంలో టర్కీ, ఫిజి, మల్డోవా, ఉక్రెయిన్ వంటివి ఉన్నాయి. స్విట్జర్లాండ్, ఫ్రాన్స్, కెనడా, యూకే వంటి దేశాల్లో ఎల్‌పీజీ ధర దాదాపు లీటరుకు ఒక డాలర్‌గా ఉంది. అదే పెట్రోల్ రేటు గురించి మాట్లాడుకుంటే.. మన దేశంలో రేటును ఇంటర్నేషనల్ డాలర్స్ రూపంలోకి మార్చుకుంటే.. ఇది లీటరుకు 5.2 ఇంటర్నేషనల్ డాలర్లకు సమానం అవుతుంది. 157 దేశాల్లో కెల్లా అత్యధిక రేట్ల పరంగా చూస్తే మనం మూడో స్థానంలో ఉన్నాం. సూడాన్‌లో 8 డాలర్లుగా, లయోస్‌లో 5.6 డాలర్లుగా ఉంది. డీజిల్ గురించి మాట్లాడుకుంటే లీటరుకు 4.68 డాలర్లుగా ఉంది. 8వ స్థానంలో ఉన్నాం. రేట్లు ఎక్కువగా ఉన్న దేశాల జాబితాలో మన కన్నా ముందు వరుసలో సుడాన్, అల్బేనియా, టర్కీ, మయన్మార్, జార్జియా, భూటన్, లయోస్ వంటివి ఉన్నాయి.