శ్రీరామనవమి విశిష్టత ఇదే

ధర్మ సంస్ధాపన కోసం త్రేతాయుగంలో శ్రీరాముడిగా శ్రీమహా విష్ణువు అవతరించినట్లు మనకు పురాణాల ద్వారా తెలుస్తోంది. చైత్రశుక్లపక్ష నవమి నాడు శ్రీరాముడు జన్మించాడు. శ్రీరాముడు వసంత ఋతువులో చైత్ర శుద్ధ నవమి, గురువారం నాడు పునర్వసు నక్షత్రం కర్కాటక లగ్నంలో మధ్యాహ్నం 12 గంటలకు జన్మించాడని ప్రతీతి. 14 ఏళ్ల అరణ్యవాసం పూర్తైన తర్వాత ఆయన అయోధ్యలో పట్టాభిషిక్తులైంది ఈరోజే అని భక్తుల విశ్వాసం. అదే రోజు శ్రీసీతారాముల కళ్యాణం కూడా జరిగిందని చెబుతారు. ఏకపత్నీవ్రతుడిగా, పితృవాక్కు పరిపాలకుడిగా శ్రీరాముడు ఆరాధ్యనీయుడు. దేశవ్యాప్తంగా ఈ రోజు రాముడికి పూజలు వైభవంగా నిర్వహిస్తారు. ఇక ఈ రోజు శ్రీరాముడిని నిష్టగా పూజించి, శ్రీరాముడి స్తోత్రాలను జపిస్తే అంతా శుభమే జరుగుతుందని పండితులు సూచిస్తున్నారు.

శ్రీరామ నవమి రోజున తలస్నానం చేయాలి. అనంతరం పసుపు లేదా పచ్చని రంగులో బట్టలు వేసుకుని ఇంటిని శుభ్రం చేసుకోవాలి. దేవుని గదిని పువ్వులతో అందంగా అలంకరించాలి. ఇంటి గుమ్మానికి మామిడి తోరణాలను కట్టాలి. గడపకు పసుపు, కుంకుమ బొట్లను పెట్టి.. ఇంటి ముందు మంచి ముగ్గును వేయాలి. భక్తి శ్రద్ధలతో పూజించి నైవేద్యం సమర్పించాలి. మీరు సమర్పించే నైవేద్యంలో వడపప్పు, పానకం ఉండేలా చూసుకోవాలని పండితులు చెబుతున్నారు. కష్టాల్లో, ఆర్థిక ఇబ్బందుల్లో ఉంటే ఆ రోజున శ్రీరాముడికి పూజ చేస్తే రామ రక్షా స్తోత్రాన్ని పఠించాలి. శ్రీరామ నవమి పర్వదినాన హనుమంతుడిని స్తుతించే హనుమాన్ చాలీసాను పఠిస్తే కోరికలన్నీ నెరవేరుతాయని భక్తులు విశ్వసిస్తారు. రామ అనే పదం నోట పలికితే ఎంతో శక్తిని ఇస్తుందని చాలామంది నమ్ముతారు. అందుకే జైశ్రీరామ్ నినాదాలు దేశవ్యాప్తంగా మిన్నంటుతున్నాయి.