సీఎం భ‌గ‌వంత్ మాన్‌పై కేసు నమోదు చేయండి: డీజీపీకి ఫిర్యాదు చేసిన బీజేపీ నేత
Andhra Pradesh Telugu | Suryaa Desk | Published : Sun, Apr 17, 2022, 12:40 AM
పంజాబ్ లో ఆమ్ ఆద్మీ పార్టీ వర్సెస్ బీజేపీ అన్నట్లుగా ప్రస్తుత పరిస్థితి తయారైంది. పంజాబ్ ముఖ్య‌మంత్రి భ‌గ‌వంత్ మాన్‌పై శ‌నివారం ఆ రాష్ట్ర పోలీసుల‌కు ఓ ఫిర్యాదు అందింది. మద్యం మ‌త్తులో భ‌గ‌వంత్ మాన్ గురుద్వారాలోకి ప్ర‌వేశించార‌ని, దీంతో ఆయ‌న‌పై కేసు నమోదు చేయాల‌ని బీజేపీకి చెందిన యువ నేత తేజింద‌ర్ పాల్ సింగ్ బ‌గ్గా నేరుగా పంజాబ్ డీజీపీకి ఫిర్యాదు చేశారు. ఈ మేర‌కు భ‌గ‌వంత్ మాన్‌పై తాను పోలీసుల‌కు చేసిన ఫిర్యాదు ప్ర‌తుల‌ను బ‌గ్గా సోష‌ల్ మీడియాలో విడుద‌ల చేశారు.
ఇదిలా ఉంటే... ఈ నెల 14న వైశాఖి సంద‌ర్భంగా తాగిన మత్తు ఇంకా దిగ‌కుండానే గురుద్వారాలోకి ప్ర‌వేశించారంటూ శిరోమ‌ణి గురుద్వారా ప్ర‌బంధ‌క్ క‌మిటీ (ఎస్జీపీసీ) భ‌గ‌వంత్ మాన్‌పై శుక్ర‌వారం సంచ‌ల‌న ఆరోప‌ణ‌లు చేసింది. ఈ ఘ‌ట‌న‌కు సంబంధించి భ‌గ‌వంత్ మాన్ క్ష‌మాప‌ణ చెప్పాల‌ని కూడా ఎస్జీపీసీ డిమాండ్ చేసింది. తాజాగా అదే ఘ‌ట‌న‌ను ప్ర‌స్తావిస్తూ మాన్‌పై కేసు నమోదు చేయాలంటూ బ‌గ్గా నేరుగా పోలీసుల‌కు ఫిర్యాదు చేయ‌డం గ‌మ‌నార్హం.
|
|