గ్రామవాలంటీర్లకు అందని గౌరవ వేతనం

తిరుపతి జిల్లా సత్యవేడు దాసుకుప్పం గ్రామ సచివాలయం పరిధిలో పనిచేస్తున్న గ్రామ వాలంటీర్లకు గౌరవ వేతనం అందని పరిస్థితి నెలకొంటోంది. మార్చినెలకు సంబంధించిన గౌరవ వేతనం ఇప్పటివరకు మంజూరు కాకపోవడం పై పలువురు గ్రామవాలంటీర్లు ఆందోళన వ్యక్తం చేస్తున్నారు. 

పేద ప్రజల కోసం ప్రభుత్వం అమలు చేస్తున్న వివిధ సంక్షేమ పథకాలను లబ్ధిదారులకు చేరవేయడంలో గ్రామవాలంటీర్లు ప్రధాన భూమిక పోషిస్తున్నారు అనుటలో సందేహం లేదు. గ్రామవాలంటీర్ల సేవా నిరతిని గుర్తించి ప్రభుత్వం ప్రతినెల ఒక్కో గ్రామ వాలంటీర్లకు ఐదువేల రూపాయలు గౌరవ వేతనంగా చెల్లిస్తోంది. ప్రతినెల రెండవ తేదీ నుంచి 5లోపు గ్రామ వాలంటీర్లకు ఇన్నాళ్లు వారి వేతనాలు బ్యాంకు ఖాతాలో సంబంధిత అధికారులు జమచేయడం జరుగుతోంది. అయితే ప్రస్తుతం దాసుకుప్పం గ్రామ సచివాలయంలో 22 మంది గ్రామవాలంటీర్లు సేవలందిస్తున్నారు. 

ఈ నేపథ్యంలో ఈసారి సచివాలయంలో పనిచేస్తున్న ఉద్యోగులందరికీ వేతనాలు జమ అయిన గ్రామ వాలంటీర్లకు గౌరవవేతనం మంజూరు కాకపోవడం విమర్శలకు దారితీస్తోంది. గత నెలకు సంబంధించిన గౌరవ వేతనం ఏప్రిల్ 18 కావస్తున్న ఇంతవరకూ మంజూరు కాకపోవడం పట్ల గ్రామ వాలంటీర్లకు ఇబ్బందులు ఏర్పడుతున్నాయి. గ్రామవాలంటీర్లకు ప్రతి నెల గౌరవ వేతనం సక్రమంగా జమఅయ్యేలా సంబంధిత మండల అధికారులు చొరవ చూపడం లేదన్న విమర్శలు వెల్లువెత్తుతున్నాయి. 

వేతనాలు మంజూరు కాకపోవడం పై సంబంధిత దాస్ కుప్పం ఇంచార్జ్ పంచాయతీ సెక్రటరీ రమణమూర్తిని వివరణ కోరగా సాంకేతిక ఇబ్బందుల వల్ల గత నెల గౌరవ వేతనం మంజూరులో జాప్యం ఏర్పడిందని, అందువల్ల మార్చి ఏప్రిల్తో కలిపి గౌరవ వేతనం చెల్లిస్తామని స్పష్టం చేశారు. ఏదేమైనా స్వచ్ఛంద సేవ చేస్తున్న గ్రామ వాలంటీర్లు సక్రమంగా గౌరవ వేతనం జమఅయ్యేలా తగు చర్యలు తీసుకోవాల్సిన బాధ్యత మండల అధికారులపై ఉంది.