ఉక్రెయిన్ పౌరుడిని కాపాడిన సెల్ ఫోన్

సెల్ ఫోన్ చేటు అంటాం కానీ రష్యా దాడులకు తెగబడిన వేళ ఓ ఉక్రెయిన్ కు అది బాగా కలిసొచ్చింది. ఆ కథేంటో తెలుసుకొందామా చుట్టూ బండరాళ్లు. అక్కడక్కడా ఆకులు రాలిపోయిన చెట్లు. కొన్ని తుప్పలు. అలాంటి చోట... సహజంగా పక్షుల కిలకిలారావాలు వినిపించాలి. కానీ అక్కడ బుల్లెట్ల మోత మోగుతోంది. ఫిరంగులు గర్జిస్తున్నాయి. ఎటు నుంచి ఏ బుల్లెట్ దూసుకొస్తుందో తెలియదు. ఎప్పుడు ఏ సైనికుడి ప్రాణం గాల్లో కలుస్తుందో చెప్పలేని పరిస్థితి. అక్కడ రూల్స్ లేవు. మంచీ చెడూ మాటల్లేవ్. ఉన్నదల్లా పోరాటమే. ఎవరు తెలివిగా పోరాడితే వాళ్లదే విజయం. ఇదే ఉక్రెయిన్‌ గడ్డపై రష్యాతో జరుగుతున్న యుద్ధం తీరు. అలాంటి చోట ఓ సైనికుడు కొద్దిలో ప్రాణాపాయం నుంచి బయటపడ్డాడు. కారణం అతని స్మార్ట్ మొబైలే. ఇద్దరు ఉక్రెయిన్ సైనికులు మాట్లాడుకుంటున్న ఓ వీడియో ఇప్పుడు సోషల్ మీడియాలో బాగా వైరల్ అవుతోంది. ఎందుకంటే సినిమాల్లో చూపించే సీన్... అక్కడ నిజంగానే జరిగింది. ఓ సైనికుడు... తన షర్ట్ పాకెట్‌లో స్మార్ట్ మొబైల్ ఉంచుకొని... యుద్ధం చేస్తున్నాడు. ఇంతలో... ఎటు నుంచి వచ్చిందో తెలియదు... ఓ 7.2 mm బుల్లెట్ దూసుకొచ్చింది. అతనికి తెలియకుండానే అది అతని షర్ట్ వైపు వచ్చి... సరిగ్గా మొబైల్‌కి గుచ్చుకొని అక్కడ ఆగిపోయింది. అదే మొబైల్ లేకపోయి ఉంటే... అది అతని నడుమును చీల్చుకుంటూ... పేగుల్ని ముక్కలు చేస్తూ... వెన్నెముక పక్క నుంచి దూసుకెళ్లేది. వెంటనే బోలెడు రక్తం కారిపోయి... సైనికుడు చనిపోయే దుస్థితి తలెత్తేది. అలా ఆ మొబైల్... అతని ప్రాణాన్ని కాపాడింది. యూట్యూబ్‌లోని Raw Ukraine Videos ఛానెల్‌లో ఆ వీడియోని ఏప్రిల్ 18, 2022న పోస్ట్ చేశారు. అది ఇప్పుడు వైరల్ అవుతోంది. 

అది నోకియా మొబైల్. దాన్ని NO KIA అని ఓ రెడ్డిట్ యూజర్ కామెంట్ ఇచ్చారు. ఇక్కడ KIA అంటే యాక్షన్‌లో చంపడం. నో కియా అంటే... యుద్ధంలో చంపకపోవడం... అనే మీనింగ్ వస్తుంది. నిజంగానే ఆ ఫోన్... ప్రాణాన్ని కాపాడేసింది.

అణ్వాయుధ దాడి జరుగుతుందా?

55 రోజులుగా యుద్ధం చేస్తున్నా... ఉక్రెయిన్... ఇంకా రష్యా వశం కాలేదు. ఇది రష్యా పాలకులకు ఏ మాత్రం మింగుడుపడట్లేదు. తన పంతం నెగ్గించుకోవాలని చూస్తున్న రష్యా అధ్యక్షుడు వ్లాదిమిర్ పుతిన్... అవసరమైతే... ఉక్రెయిన్‌పై అణ్వాయుధ దాడి చేస్తారనే వార్తలు వస్తున్నాయి. బ్రిటన్ నిఘా వర్గాలు ఈ దిశగా కొన్ని హెచ్చరికలు చేశాయి. అణ్వాయుధ దాడికి సంబంధించిన ఆయుధాలను రష్యా రెడీ చేస్తోందని అంటున్నాయి.