దూసుకొస్తున్న అసని తుఫాన్

ఏపీ వైపు అసని తుఫాన్ దూసుకొస్తోంది. ఆగ్నేయ బంగాళాఖాతంలో ఏర్పడిన తుఫాన్ తీవ్ర తుఫాన్ గా మారింది. ఇది క్రమంగా దిశ మార్చుకుంటూ ఉత్తర ఈశాన్యం వైపు కదులుతూ ఒడిశా తీరానికి చేరే అవకాశముందని వాతావరణ శాఖ అంచనా వేస్తోంది.న్యూస్ కథనం ప్రకారం.. అసని తుఫాన్ ఒడిశా వైపు వెళ్లినా.. ఏపీ తీరంపైనా తీవ్రంగా ప్రభావం చూపే అవకాశముంది. ప్రస్తుతం గంటకు 14 కిలోమీటర్ల వేగంతో విశాఖపట్నానికి ఆగ్నేయంగా 640 కిలోమీటర్లు, పూరీ తీరానికి 670 కిలోమీటర్ల దూరంలో కేంద్రీకృతమైంది.

అసనీ తుఫాన్ ప్రభావంతో మంగళవారం శ్రీకాకుళం, విజయనగరం, మన్యం పార్వతీపురం, విశాఖపట్నం, అల్లూరు సీతారామరాజు, అనకాపల్లి జిల్లాలపై ప్రభావం చూపే అవకాశముందని వాతావరణ శాఖ అంచనా వేస్తోంది.తుఫాన్ నేపథ్యంలో ఏపీలోని అన్ని పోర్టులకు రెండో నెంబర్ ప్రమాద హెచ్చరిక జారీ చేశారు. శ్రీకాకుళం, ఉమ్మడి విజయనగర, విశాఖ జిల్లాల్లో భారీ వర్షాలు కురిసే అవకాశమున్నట్లు అధికారులు హెచ్చరిస్తున్నారు. ఆయా జిల్లాలో ఓ మోస్తరు నుంచి భారీ వర్షాలు కురుస్తాయని.. లోతట్టు ప్రాంతాలు అప్రమత్తంగా ఉండాలని హెచ్చరించారు.

తుఫాన్ తీరంవైపు దూసుకొస్తున్న నేపథ్యంలో ఉత్తరాంధ్ర జిల్లాలకు వాతావరణ శాఖ ఎల్లో అలర్ట్ జారీ చేసింది. ఈ మూడు జిల్లాల ప్రజలు అప్రమత్తంగా ఉండాలని హెచ్చరించింది. తీరంవెబడి గంటకు 102-115 కిలోమీటర్ల వేగంతో గాలులు వీచే అవకాశముందన్నారు.ఇదిలా ఉంటే తుఫాన్ తీరాన్ని తాకుందా లేదా అనేది స్పష్టంగా తెలియడం లేదు. ఇది క్రమంగా దిశమార్చుకుంటూ సముద్రంలోనే బలహీన పడే అవకాశాలున్నట్లు వాతావరణ శాఖ అంచనా వేస్తోంది. ఐతే సముద్రంలో వాతావరణం అల్లకల్లోలంగా ఉండే ఛాన్స్ ఉండటంతో మత్స్యకారులు వేటకు వెళ్లరాదని వాతావరణ శాఖ హెచ్చరిస్తోంది. ఏపీలో వేట నిషేధ సమయం కాడవడంతో మత్స్యకారులకు వెళ్లే అవకాశం లేదు.