అంబులెన్స్ కు బదులు...స్ట్రెచర్‌పై రోగి తరలింపు

వింత ఘటనలు, విషాధకర ఘటనలు మన దేశంలోనే ఎక్కువగా కనిపిస్తున్నాయి. తాజాగా ఓ వింత ఘటన ఛత్తీస్ ఘడ్ లో చోటుచేసుకొంది. ఎవరికైనా జబ్బు చేసి సీరియస్‌గా ఉంటే వెంటనే ఆస్పత్రికి తీసుకెళ్తాం. అక్కడ డాక్టర్ లేకపోతే వెయిట్ చేస్తాం. ఎప్పుడొస్తారో కనుక్కుని కంగారుగా ఆయన కోసం ఎదురు చూస్తుంటాం. అక్కడి సిబ్బంది కూడా డాక్టర్ వస్తారు.. వెయిట్ చేయండనే చెబుతారు. లేదా వేరే డాక్టర్‌కు రిఫర్ చేస్తారు. రోగి త్వరగా కోలుకోవాలనే ఆత్రుతతో ఏ డాక్టర్‌కైనా వెంటనే చూపిస్తారు. అయితే ఛత్తీస్‌గఢ్ కోరియా జిల్లాలో దీనికి భిన్నంగా జరిగింది.

బైకుంత్‌పూర్‌లోని జిల్లా ఆస్పత్రికి సీరియస్‌గా ఉందని బంధువులు ఓ రోగిని తీసుకెళ్లారు. అప్పటికే ఓపీ టైం అయిపోయిందని సిబ్బంది చెప్పారు. అయినా ఆస్పత్రి సివిల్ సర్జన్ కేఎల్ ధ్రువ్ గురించి అడిగారు. ఆయన ఇంటికెళ్లిపోయారని ఇప్పట్లో రారని స్టాఫ్ చెప్పారు. డాక్టర్ ధ్రువ్ ఆస్పత్రిలో లేరని తెలుసుకున్న రోగి కుటుంబ సభ్యులు నిరాశపడ్డారు. అయినా సరే ఆగకుండా వెంటనే రోగిని స్ట్రెచర్‌పై పెట్టి డాక్టర్ ఇంటికే నేరుగా తీసుకెళ్లిపోయారు. రోడ్డుపై నెట్టుకుంటూ తీసుకెళ్లారు.

డాక్టర్ ధ్రువ్‌ హస్తవాసిపై చాలా నమ్మకం ఉండడంతో... ఎలాగైన అతని దగ్గరకే వెళ్లాలని ఇలా చేశారు. కోరియా జిల్లాలోని వైకుంఠపుర్లో ఈ ఘటన చోటుచేసుకుంది. దీనికి సంబంధించిన వీడియో సోషల్ మీడియాలో వైరల్ అయింది. అలాగే డాక్టర్ సూచన మేరకు రోగిని మళ్లీ ఆస్పత్రికే తీసుకెళ్లారు. ఆస్పత్రి సిబ్బంది వెంటనే చికిత్స ప్రారంభించామని పేర్కొన్నారు. అయితే స్ట్రెచర్‌‌ను తీసుకెళ్లడం ఎవరూ గమనించలేదని ఆస్పత్రి సిబ్బంది చెప్పారు. ఇదిలావుంటే ఇటీవలె యూపీలో పెట్రోల్ కొరత కారణంగా అంబులెన్స్‌లో రాకపోవడంతో రోగిని చేతితో లాగే బండిపై ఆస్పత్రికి తీసుకెళ్లారు. బల్లియాలో ఈ సంఘటన చోటుచేసుకుంది. అదేరోజు బనారస్ నుంచి అంబులెన్స్ రావడంతో దాంతో అందులో పెట్రోల్ లేదని ఆస్పత్రి చీఫ్ మెడికల్ ఆఫీసర్ నీరజ్ పాండి చెప్పారు.