రిటైర్మెంట్ ప్లాన్ చేసుకోండిలా

పదవీ విరమణ తరువాత ఇపుడు చాలా రాష్ట్రాల్లోనూ పెన్షన్ విధానం అమలులేదు. దీంతో ఉద్యోగ విరమణ అనంతరం మా పరిస్థితి ఏమిటీ అన్నది ప్రతిచోట తలెత్తుతోంది. పదవీ విరమణ తర్వాత ఎలాంటి ఆర్థిక ఇబ్బందులు లేకుండా జీవించాలని ప్రతి ఒక్కరూ కోరుకుంటారు. దీని కోసం ఉద్యోగంతో పాటే రిటైర్‌మెంట్ ప్లానింగ్ చేసుకోవడం ఎంతో అవసరం. ఇప్పటి నుంచి మీ వేతనంలో ఎంతో కొంత ఇన్వెస్ట్ చేసుకోవాలి. రిటైర్‌మెంట్‌ తర్వాత మెరుగైన రిటర్నులను అందించే ఆప్షన్లలో ఒకటే నేషనల్ పెన్షన్ స్కీమ్(ఎన్‌పీఎస్). ఎన్‌పీఎస్‌లో ఇన్వెస్ట్ మెంట్ చేయడం ద్వారా మీరు నెలకు రూ.50 వేల పైన పెన్షన్‌గా పొందవచ్చు. ఈ పెన్షన్ పొందాలంటే ఎలాగో ఓసారి తెలుసుకోండి.

ఒకవేళ మీ వయసు 30 ఏళ్లు అనుకుంటే.. ప్రతి నెలా మీరు ఎన్‌పీఎస్‌లో రూ.10 వేలు ఇన్వెస్ట్ చేయాల్సి ఉంటుంది. ఇలా 30 ఏళ్ల పాటు చేయాల్సి ఉంటుంది. అప్పటికీ మీకు 60 ఏళ్లు వస్తాయి. మీరు ఇన్వెస్ట్ చేసిన మొత్తం రూ.36 లక్షల పైన అవుతుంది. దీనిపై 10 శాతం రిటర్నులను లెక్కలోకి తీసుకుంటే.. రిటైర్‌మెంట్ సమయంలో ఈ మొత్తం రూ.2.53 కోట్లవుతుంది. ఈ కార్పస్‌లో 40 శాతాన్ని యాన్యుటీలో పెట్టుబడిగా పెట్టాల్సి ఉంటుంది. ఈ యాన్యుటీ మొత్తాన్ని తీసివేసిన తర్వాత మీకు చేతిలోకి రూ.కోటిన్నరకు పైగా వస్తాయి. అంతేకాక యాన్యుటీలో పెట్టిన మొత్తంతో ప్రతి నెలా రూ.50 వేలపైన పెన్షన్‌గా వస్తుంది. దీంతో మీ వృద్ధాప్యాన్ని మీరు ఎలాంటి టెన్షన్ లేకుండా గడపవచ్చు. ఎవరిపై మీరు ఆధారపడాల్సినవసరం రాదు.

ఎన్‌పీఎస్ అనేది ప్రభుత్వ గ్యారెంటీ పథకం. దీనిపై 9 శాతం నుంచి 12 శాతం మధ్యలో వార్షిక రిటర్నులను మీరు పొందవచ్చు. మెచ్యూరిటీలో 40 శాతాన్ని మీరు యాన్యుటీలో పెట్టాల్సి ఉంటుంది. దీంతో మీకు యాన్యుటీ నుంచి ప్రతి నెలా పెన్షన్ వస్తుంది. యాన్యుటీ రిటర్నులు 6 శాతంగా ఉంటున్నాయి.

ఎన్‌పీఎస్‌లో ఇన్వెస్ట్‌మెంట్..

వయసు.. 30 ఏళ్లు

పదవీ విరమణ వయసు.. 60 ఏళ్లు

ప్రతి నెలా పెట్టుబడి పెట్టాల్సిన మొత్తం.. రూ.10 వేలు

యాన్యుటీ కాలం.. 20 ఏళ్లు

యాన్యుటీ ప్లాన్‌లో పెట్టుబడి పెట్టాల్సిన మొత్తం.. 40 శాతం

యాన్యుటీపై రిటర్నులు.. 6 శాతం

మరోవైపు ఎన్‌పీఎస్‌కు పన్ను ప్రయోజనాలు కూడా ఉన్నాయి. రెండు లక్షల వరకు పన్ను ప్రయోజనాలను పొందవచ్చు. ఆదాయపు పన్ను చట్టం సెక్షన్ 80సీ కింద రూ.లక్షన్నర వరకు పన్ను మినహాయింపు ఉంది. ఎన్‌పీఎస్‌లో పెట్టుబడిగా పెడితే అదనంగా మరో రూ.50 వేల వరకు పన్ను మినహాయింపు లభిస్తుంది.