ఈ ఉమ్మడి కుటుంబం అందరికీ ఆదర్శం

ఈ రోజుల్లో ఉమ్మడి కుటుంబాలు ఎక్కడా కనిపించడం లేదు. ఒక ఇంట్లో ఐదారుగురు సభ్యులు ఉంటేనే ఎన్నో సమస్యలు, మనస్పర్థలు వస్తున్నాయి. కుటుంబ నిర్వహణ కూడా భారంగా మారుతోంది. కానీ బీహార్​ లో ఓ ఉమ్మడి కుటుంబం అందరికీ ఆదర్శంగా నిలుస్తోంది. ఒకే ఇంట్లో ఏకంగా 62 మంది కలిసి జీవిస్తున్నారు. ఎలాంటి గొడవలు, సమస్యలు లేకాండా ఉంటున్నారు.

బీహార్ రాష్ట్రంలోని బోధ్​గయాకు చెందిన ఈ కుటుంబాన్ని కల్యాణ్ కుటుంబం అని పిలుస్తారు. ఈ ఇంటికి కృష్ణ కన్నయ్య ప్రసాద్, రాధికా దేవి​ పెద్దలు. ఈ కుటుంబం విడిపోకుండా వీరే చూసుకుంటున్నారు. మొత్తం 62 మంది ఉండే ఈ ఇంట్లో 57 గదులు ఉంటాయి. దాదాపు అందరికీ ప్రత్యేక గదులు ఉన్నాయి. ఒకటిన్నర ఎకరం విస్తీర్ణంలో ఉన్న ఈ ఇంటిని కల్యాణ్ పరివార్​ కాంప్లెక్స్ అంటారు. అయితే ఇంత మందికి కలిపి ఒకే కిచెన్ ఉంటుంది. అందరూ ఒకేసారి భోజనం చేస్తారు. ఈ ఫ్యామిలీలో 9 మంది అన్నదమ్ములు ఉన్నారు.

ఈ కుటుంబంలో మొత్తం 6 తరాలు ఉండగా, ప్రస్తుతం 4 తరాల వారు ఈ ఇంట్లో ఉన్నారు. అందరికంటే పెద్ద కృష్ణ కన్నయ్య ప్రసాద్. పదేళ్ల చమి కల్యాణ్​ అనే పాప అతి చిన్న వయస్కురాలు. తమ కుటుంబంలో కజిన్స్ ​తో కలిపి మొత్తం 9 మంది అన్నదమ్ములని వివేక్ కల్యాణ్ సింగ్ తెలిపారు. ఏడుగురు అక్కాచెల్లెళ్లు ఉన్నారని, అందరికీ పెళ్లిళ్లు అయ్యాయని తెలిపారు. ఇంట్లో మొత్తం 21 మంది పిల్లలు ఉన్నారని వెల్లడించారు. ఈ ఉమ్మడి కుటుంబం 5 ఎన్జీఓల సాయంతో తమ ప్రాంతంలోని పేదలకు సాయం చేస్తున్నారు. ఈ ఇంట్లో ఉన్న అన్నాదమ్ములందరికీ వ్యాపారాలున్నాయి. హోటల్స్, హార్డ్​ వేర్, శానిటరీ ఐటెమ్స్, టైల్స్-మార్బుల్స్, భవన నిర్మాణ వస్తువులు, ఎలక్ట్రిక్ వస్తువులు వంటి భిన్న రకాల వ్యాపారాలు చేస్తున్నారు.