సృజన మృతి కేసులో వీడిన మిస్టరీ

విశాఖపట్నంలోని మధురవాడలో పెళ్లి పీటలపై వధువు కుప్పకూలి చనిపోయిన ఘటనలో మిస్టరీ వీడింది. వధువు సృజన పెళ్లి ఇష్టం లేక విషపదార్థాలు తిని మృతి చెందిందని తొలుత ప్రచారం జరిగింది. అయితే కుటుంబ సభ్యులు వాటిని ఖండించారు. సృజన ఇష్టంతోనే పెళ్లి నిర్ణయం జరిగిందని అన్నారు. అయితే పోలీసుల విచారణలో కొత్త విషయాలు వెలుగులోకి వచ్చాయి. సృజనకు శివాజీతో పెళ్లి ఇష్టం లేదని, పెళ్లిని ఆపేందుకు ప్రయత్నించిన క్రమంలో ఆమె ప్రాణాలు కోల్పోయిందని పోలీసులు తెలిపారు. సృజన ఆత్మహత్యకు ప్రేమ వ్యవహారమే కారణమని పోలీసులు తేల్చారు.

సృజన గత ఏడేళ్లుగా పరవాడకు చెందిన తోకాడ మోహన్ తో ప్రేమలో ఉందని పోలీసుల విచారణలో తెలిసింది. సృజన ఫోన్ ను పోలీసులు స్వాధీనం చేసుకొని పరిశీలించారు. విచారణలో భాగంగా కాల్ డయల్ రికార్డర్ తో అసలు నిజాలు వెలుగులోకి వచ్చాయి. తోకాడ మోహన్ అనే వ్యక్తితో సృజన ఏడేళ్లుగా ప్రేమలో ఉంది. సరైన ఉద్యోగం చూసుకోగానే పెళ్లి చేసుకుంటానని సృజనకు మోహన్ హామీ ఇచ్చాడు. ఇంతలోనే కుటుంబ సభ్యులు సృజనకు పెళ్లి సంబంధం చూశారు. పెళ్లి పనులు వేగంగా జరిగిపోయాయి.

ఈ క్రమంలో తనకు ఈ పెళ్లి ఇష్టం లేదని, ఎలాగైనా తనను తీసుకుపోవాలని మోహన్ కు సృజన చెప్పింది. రెండేళ్లు ఆగాలని, జాబ్ కోసం ప్రయత్నిస్తున్నానని, మంచి ఉద్యోగం రాగానే తీసుకెళ్తానని మోహన్ సృజనకు తెలిపాడు. పెళ్లికి 3 రోజుల ముందు సృజన ప్రియుడితో ఇన్ స్టా గ్రామ్ లో చాటింగ్ చేసినట్లు పోలీసులు గుర్తించారు. పెళ్లిని ఎలాగైనా ఆపాలనుకున్న సృజన ఈ నెల 11న పెళ్లి జరగాల్సిన రోజు విష పదార్థం తీసుకుంది. పెళ్లి పీటలపైనే కుప్పకూలి ఆస్పత్రిలో చికిత్స పొందుతూ మృతి చెందింది. అయితే సృజన కేవలం పెళ్లిని ఆపాలని ప్రయత్నించింది కానీ ఊహించని రీతిలో ప్రాణాలను కోల్పోయిందని పోలీసులు విచారణలో తేల్చారు.