స్పైస్‌జెట్ రూట్ నెట్‌వర్క్‌ను విస్తరణ: ఆ సంస్థ సీఎండీ వెల్లడి

భారత్‌లోనూ, ప్రపంచవ్యాప్తంగా సరికొత్త మార్గాలను, ప్రత్యేకమైన మార్గాలను కలుపుతూ స్పైస్‌జెట్ రూట్ నెట్‌వర్క్‌ను విస్తరించనున్నట్టు ఆ సంస్థ సీఎండీ స్పష్టంచేశారు. కరోనా సమయంలో స్పైస్‌జెట్ కీలక పాత్ర పోషించిందని, లక్షకు పైగా ఆక్సిజన్ కాన్సట్రేటర్లను సరఫరా చేసిందని తెలిపారు. దేశంలో కరోనా టీకాలను సరఫరా చేసిన తొలి, అతిపెద్ద రవాణా సంస్థగా స్పైస్‌జెట్ నిలిచింది.

ఇదిలావుంటే విమానాల్లో త్వరలోనే బ్రాడ్‌బ్యాండ్ ఇంటర్నెట్ సర్వీసులు ప్రారంభం కాబోతున్నాయి. తమ విమానాల్లో త్వరలోనే ఇంటర్నెట్ సర్వీసులను ప్రారంభిస్తామని ఈ విమానయాన సంస్థ ఛైర్మన్, మేనేజింగ్ డైరెక్టర్(సీఎండీ) అజయ్ సింగ్ తెలిపారు. అంతేకాక వచ్చే కొన్ని నెలల్లో మరిన్ని బోయింగ్ 737 మ్యాక్స్ ఎయిర్‌క్రాఫ్ట్‌లను తమ విమానాలకు జత చేర్చుతామని చెప్పారు. ప్రస్తుతం ఈ విమానయాన సంస్థకు 91 ఎయిర్‌క్రాఫ్ట్‌లు ఉంటే.. వాటిలో 13 మ్యాక్స్ విమానాలు కాగా.. 46 పాత వెర్షన్లకు చెందిన బోయింగ్737 ఎయిర్‌క్రాఫ్ట్‌లని కంపెనీ వెబ్‌సైట్‌లో తెలిసింది.

17వ వార్షికోత్సవం సందర్భంగా ఈ విమానయాన సంస్థ ఉద్యోగులకు రాసిన ఈమెయిల్‌లో అజయ్ సింగ్ ఈ విషయాలను వెల్లడించారు. ప్రతి నెలలో ప్రయాణికుల సంఖ్య పెరుగుతుందని, రాబోయే నెలల్లో ఈ సంఖ్య మరింత పెరుగుతుందనే అంచనాలున్నాయని అంజయ్ సింగ్ తెలిపారు. ‘‘బోయింగ్ 737 మ్యాక్స్ మా ఫ్లాగ్‌షిప్ విమానాలు. విజయవంతంగా ఈ విమానాలు మళ్లీ వాటి సర్వీసులను ప్రారంభించి, ప్రయాణికుల నుంచి మంచి సమీక్షలను పొందుతున్నాయి. వచ్చే కొన్ని నెలల్లో మా ఫ్లీట్‌కు మరిన్ని మ్యాక్స్ ఎయిర్‌క్రాఫ్ట్‌లను జత చేస్తాం. మ్యాక్స్ పాత ఎయిర్‌క్రాఫ్ట్‌ల స్థానంలో ఈ కొత్త వాటిని భర్తీ చేస్తాం’’ అని అజయ్ సింగ్ చెప్పారు.

ఇండస్ట్రీలో తన నాయకత్వ స్థానాన్ని కన్సాలిడేట్ చేసుకుని, మరింత బలోపేతం చేసుకునేందుకు స్పైస్‌ఎక్స్‌ప్రెస్‌కు కూడా మరిన్ని ఫ్రయిటర్ విమానాలను యాడ్ చేస్తామని సింగ్ చెప్పారు. స్పేస్‌ఎక్స్‌ప్రెస్ అనేది ఈ విమానయాన సంస్థకు చెందిన విజయవంతమైన కార్గో కంపెనీ. ఈ ఏడాది తమ నెట్‌వర్క్‌కు మరిన్ని కొత్త ప్రొడక్టులను, కొత్త మార్గాలను యాడ్ చేస్తామని కూడా సింగ్ తెలిపారు.