ఇంటి నిర్మాణ మరింత ప్రీయం...సొంతింటి కల ఇక కలయేనా

భారీగా పెరిగిన సిమెంట్, స్టీల్ ధరలతో ఇప్పటికే నిర్మాణ రంగంలో వేగం తగ్గింది. తాజాగా సిమెంట్ కంపెనీల నిర్ణయంతో నిర్మాణ రంగం పరిస్థితి ఏమిటీ అన్న ఆందోళన వ్యక్తమవుతోంది. ఈ ధరలు ఇప్పటికే అమాంతంగా పెరిగాయి. కానీ ఇంకా పెరిగితే సామాన్యుడి సొంతింటి కల కలగానే మిగిలిపోయే ప్రమాదముంది. ధరల పెరగుదలతో ఇప్పటికే ప్రజలు తీవ్ర ఇబ్బందులు పడుతున్నారు. అయితే ఇప్పుడు మళ్లీ ధరలు పెరగబోతున్నాయి. కొత్తగా ఇల్లు కట్టుకోవాలని చూస్తున్న వారిపై ప్రతికూల ప్రభావం పడనుంది. సిమెంట్ ధరలు వచ్చే నెల నుంచి పెరగబోతున్నాయి. దీని వల్ల ఇల్లు కట్టుకోవాలనుకునే వారిపై అధిక భారం పడనుంది. ప్రముఖ సిమెంట్ కంపెనీ ఇండియా సిమెంట్స్  ధరలను పెంచుతున్నట్లు ప్రకటించింది. జూలై 1 నాటికి కంపెనీ విడతల వారీగా క్రమంగా ధరలను పెంచుకుంటూ వెళ్లనుంది. ధరలు రూ. 55 మేర పెరగనన్నాయి. ముడి పదార్థాల ధరలు పెరగడం వల్ల ఉత్పత్తి వ్యయాలు పైకి చేరడం వల్ల ధరల పెంచాల్సి వచ్చిందని కంపెనీ పేర్కొంటోంది.

ఇండియా సిమెంట్ వైస్ ప్రెసిడెంట్, మేనేజింగ్ డైరెక్టర్ ఎన్ శ్రీనివాసన్ మాట్లాడుతూ.. సిమెంట్ ధరలను పెంచనున్నామని వెల్లడించారు. జూన్ 1 నుంచి సిమెంట్ బస్తా రేటు రూ. 20 పెరుగుతుందని తెలిపారు. అలాగే జూన్ 15 నుంచి ధరల పెంపు మరో రూ. 15 ఉంటుందని పేర్కొన్నారు. అలాగే జూలై 1 నుంచి సిమెంట్ రేటు రూ. 20 పెరుగుతుందని వివరించారు. ఇలా మొత్తంగా సిమెంట్ బస్తా రేటు రూ. 55 మేర పైకి చేరనుంది. దీని వల్ల వినియోగాదారులపై తీవ్ర ప్రతికూల ప్రభావం పడనుంది.

మార్కెట్‌లో పలు రకాల ముడి పదార్థాల ధరలు పెరిగాయని, అందువల్ల ధరలు పెంచాల్సి వస్తోందని ఆయన తెలిపారు. సీఈవోగా తన పని తాను చేస్తున్నట్లు వెల్లడించారు. ఒకవేళ ఈ నిర్ణయం తీసుకోకపోతే కంపెనీ నష్టాలు భారీగా పెరిగే అవకాశం ఉందని తెలిపారు. కాగా ధరల పెంపు వల్ల సిమెంట్ అమ్మకాలపై ప్రభావం పడే అవకాశం ఉంది. ఈ అంశాన్ని కంపెనీ ఎలా అధిగమిస్తుందో చూడాల్సి ఉంది.

ఇండియా సిమెంట్ తాజాగా ఆర్థిక ఫలితాలు కూడా వెల్లడించింది. 2021-22 ఆర్థిక సంవత్సరం నాలుగు త్రైమాసికంలో కంపెనీ నష్టాలు రూ. 230 కోట్లకు పైగా ఉన్నాయి. కంపెనీ గత ఆర్థిక సంవత్సరం ఇదే త్రైమాసికంలో రూ. 71.6 కోట్ల లాభాన్ని నమోదు చేసింది. అదే సమయంలో కంపెనీ ఆదాయం కూడా తగ్గింది. 4 శాతం క్షీణించింది. రూ. 1449 కోట్ల నుంచి రూ. 1391 కోట్లకు క్షీణించింది. అలాగే కంపెనీ వ్యయాలు 2.5 శాతం మేర పెరిగాయి. రూ. 1459 కోట్లుగా ఉన్నాయి. అందుకే కంపెనీ ఇప్పుడు ధరల పెంపు నిర్ణయానికి వచ్చిందని చెప్పుకోవచ్చు. కాగా దక్షిణ భారత దేశంలో సిమెంట్ ధరలు సగటున రూ. 360 నుంచి రూ. 400 మధ్యలో ఉన్నాయని శ్రీనివాసన్ తెలిపారు. దక్షిణ భారత దేశంలో ఇండియా సిమెంట్ అతిపెద్ద సిమెంట్ తయారీ కంపెనీగా కొనసాగుతోంది.