మానవత్వం పరిమళ్లించింది...ఆ చిన్నారికి రెండో కాలొచ్చింది

మాయమైపోతున్నాడమ్మ మనిషన్న వాడు అన్న రోజులలో  ఇంకా మానవత్వం బతికిందని నిరూపిస్తున్న ఘటనలు దర్శనమిస్తున్నాయి. సోషల్ మీడియా లేకపోతే ఇంకా మానవత్వంలేదన్న కర్కసత్వం మనిషిలో పెట్రేగేది. ఇదిలావుంటే ఒక కాలు లేకున్నా ఒంటి కాలుతో గెంతుతూ కిలో మీటర్ దూరంలోని స్కూల్‌కి వెళ్తున్న బీహార్ అమ్మాయి వీడియో యావత్ దేశాన్ని కదిలించిన సంగతి తెలిసిందే. పదేళ్ల ఆ అమ్మాయి సీమాకు ఇప్పుడు రెండో కాలు వచ్చేసింది. సీమా వీడియో వైరల్ కావడంతో చాలా మంది స్పందించారు. ఆమెకు ఇప్పుడు ప్రొస్థెటిక్ కాలు వచ్చేసింది. జాముయి జిల్లా అధికారులు సీమాకు ట్రై-సైకిల్ అందించారు. సీమా రెండు కాళ్లతో నిల్చున్న ఫొటోలు ఇప్పుడు సోషల్ మీడియాలో వైరల్ అవుతున్నాయి. ‘దటీజ్ సోషల్ మీడియా పవర్’, ‘పాజిటివ్ పవర్ ఆఫ్ సోషల్ మీడియా’ అంటూ సామాన్యుల నుంచి ప్రముఖుల వరకూ కామెంట్లు పెడుతున్నారు.

బీహార్‌ లోని జాముయి జిల్లా ఫతేపూర్ గ్రామానికి చెందిన సీమా రెండేళ్ల కిందట జరిగిన ఓ రోడ్డు ప్రమాదంలో ఒక కాలును కోల్పోయింది. ఐతే, తన ఆత్మవిశ్వాసాన్ని మాత్రం కోల్పోలేదు. చదువుకోవాలనే సంకల్పం చెక్కుచెదరలేదు. ఒంటి కాలుతో గెంతుతూ ఆమె రోజూ పాఠశాలకు వెళ్లొస్తోంది. జరిగిన విషాదానికి కుంగిపోకుండా.. ఒక్క కాలుతోనే నడవాలనే బాధను పట్టించుకోకుండా తన పని తాను చేసుకుపోతున్న సీమా నేడు ఎందరికో స్ఫూర్తిదాయకంగా నిలిచింది. సీమా తన వీపునకు బ్యాగ్‌ తగిలించుకుని, ఒంటి కాలుతో స్కూల్‌కి వెళుతున్న వీడియో సోషల్‌ మీడియాలో వైరల్‌ అయ్యింది. ఇది పలువురి మనసులను కదిలించింది. సీమా వీడియో వైరల్ కావడంతో జాముయి జిల్లా మేజిస్ట్రేట్ (జిల్లా కలెక్టర్) అవనీశ్ శరణ్ తన బృందంతో కలిసి ఫతేపూర్ గ్రామానికి వచ్చారు. ఆమెకు ట్రై-సైకిల్‌ను బహుమతిగా ఇచ్చారు. బాలిక కుటుంబానికి ప్రభుత్వం తరఫున చేయగలిగినవన్నీ చేస్తామని హామీ ఇచ్చారు.

బాలీవుడ్ నటుడు, మానవతామూర్తి సోనూ సూద్ కూడా సీమాకు సాయం చేస్తానని ఇప్పటికే ప్రకటించారు. బాలిక వీడియోపై ఆయన స్పందిస్తూ.. ‘సీమా ఇప్పుడు ఒక్కటి కాదు, రెండు కాళ్లతో స్కూల్‌కి వెళ్తుంది. టికెట్ పంపిస్తున్నాను. ఆమె తన రెండు కాళ్లపై నడిచే సమయం ఆసన్నమైంది’ అని ట్వీట్ చేశారు. ఐపీఎస్ అధికారి, తెలంగాణ షీటీమ్స్, భరోసా సెంటర్స్ ఏడీజీ స్వాతి లక్రా ‘ది పాజిటివ పవర్ ఆఫ్ సోషల్ మీడియా’ అంటూ ట్వీట్ చేశారు. ‘ఒక కాలు లేకున్నా ఒంటి కాలుతోనే స్కూల్‌కి వెళ్తున్న బాలిక సీమాకు ప్రొస్థెటిక్ కాలు వచ్చేసింది. ఇప్పుడామె తన రెండు కాళ్లపై నిల్చుంది’ అని స్వాతి లక్రా ట్వీట్ చేశారు.