కేంద్రానికి కాసులు కురిపిస్తున్న జీఎస్టీ...ఏకంగా 44శాతం పెరిగిన వసూళ్లు

జీఎస్టీ రూపంలో దేశానికి కాసులు వచ్చిపడుతున్నాయి. ప్రతి ఏడాది జీఎస్టీ వసూళ్లలో  పెరుగుల  కనిపిస్తోంది. తాజాగా జీఎస్‌టీ వసూళ్ల జోరు కొసాగుతోంది. 2022 మే నెలలో స్థూల జీఎస్టీ ఆదాయం రూ. 1,40,885 కోట్లుగా నమోదు అయ్యింది. ప్రభుత్వ గణాంకాలు ఈ విషయాన్ని వెల్లడిస్తున్నాయి. మే నెలలో జీఎస్‌టీ కలెక్షన్లు వార్షిక ప్రాతిపదికన చూస్తే ఏకంగా 44 శాతం మేర పెరిగాయి. గత ఏడాది ఇదే నెలలో జీఎస్‌టీ కలెక్షన్లు రూ. 97,821 కోట్లుగా నమోదు అయ్యాయి. అయితే నెలవారీగా చూస్తే మాత్రం జీఎస్‌టీ వసూళ్లలో తగ్గుదల నమోదు అయ్యింది. జీఎస్‌టీ కలెక్షన్లు ఏప్రిల్ నెలలో ఆల్‌టైమ్ గరిష్టాన్ని తాకిన విషయం తెలిసిందే. రూ. 1.67 లక్షల కోట్లుగా నమోదు అయ్యాయి.

‘మే నెలతో జీఎస్‌టీ వసూళ్లు గత నెల అంటే కొత్త ఆర్థిక సంవత్సరం తొలి నెల ఏప్రిల్ వసూళ్లతో పోలిస్తే సాధారణంగానే తక్కువగా ఉంటాయి. అయితే మే నెలలో కూడా జీఎస్‌టీ వసూళ్లు 1.4 లక్షల కోట్ల మార్క్‌ను దాటడం చెప్పుకోదగ్గ అంశం’ అని ఆర్థిక మంత్రిత్వ శాఖ తెలిపింది. గత ఏడాది మే నెలతో పోలిస్తే ఈ ఏడాది మే నెలలో గూడ్స్ దిగుమతుల నుంచి వచ్చిన ఆదాయం 43 శాతం మేర పెరిగింది. డొమెస్టిక్ ట్రాన్సాక్సన్ల ద్వారా లభించిన ఆదాయం (సర్వీసుల దిగుమతులు సహా) 44 శాతం మేర పైకి చేరింది.

మొత్తం రూ.1,40,885 కోట్ల జీఎస్‌టీ వసూళ్లలో సెంట్రల్ గూడ్స్ అండ్ సర్వీసెస్ ట్యాక్స్ (సీజీఎస్‌టీ) వాటా రూ. 25,036 కోట్లుగా ఉంది. స్టేట్ గూడ్స్ అండ్ సర్వీసెస్ ట్యాక్స్ (ఎస్‌జీఎస్‌టీ) వాటా రూ. 32,001 కోట్లుగా నమోదు అయ్యింది. ఇంటిగ్రేటెడ్ గూడ్స్ అండ్ సర్వీస్ ట్యాక్స్ (ఐజీఎస్‌టీ) వాటా రూ. 73,345 కోట్లుగా ఉంది. గూడ్స్ దిగుమతుల ఆదాయం రూ. 37,469 కోట్లు ఇందులో భాగమే. సెస్ రూపంలో రూ. 10,502 కోట్లు లభించాయి. జీఎస్‌టీ వసూళ్లు రూ. 1.4 లక్షల కోట్లు దాటడం ఇది వరుసగా మూడో నెల కావడం గమనార్హం. అలాగే మొత్తంగా చూస్తే నాలుగు సార్లు జీఎస్‌టీ కలెక్షన్లు ఈ మార్క్‌ను అధిగమించాయి. జీఎస్‌టీ వసూళ్లు రూ.లక్ష కోట్లు దాటడం ఇది వరుసగా 11వ నెల అని చెప్పుకోవచ్చు.