టిక్ టాక్ మళ్లీ భారత్ లోకి వస్తుందా...తిరిగివచ్చేందుకు టిక్ టాక్ యత్నాలు

భారతదేశంలో తిరిగి రంగ ప్రవేశం చేసేందుకు టిక్ టాక్ సర్వశక్తులు ఓడుతోంది. భారత్‌కు చెందిన హిరనందని గ్రూప్‌ తో భాగస్వామ్యం ఏర్పరుచుకొని ఇండియాలో టిక్‌టాక్‌ను మళ్లీ లాంచ్ చేయాలని బైట్‌డ్యాన్స్ ఆలోచిస్తోందని ఎకనమిక్స్ టైమ్స్ రిపోర్ట్ వెల్లడించింది. అయితే చైనాతో ఉద్రిక్తతలు అలాగే ఉన్న కారణంగా టిక్‌టాక్‌ను రీలాంచ్ చేసేందుకు బైట్‌డ్యాన్స్‌కు భారత ప్రభుత్వం అనుమతి ఇస్తుందా అన్న విషయంపై స్పష్టత లేదు. అయితే ఇండియన్ యూజర్లతో మళ్లీ కనెక్ట్ అయ్యేందుకు చాలా ఆసక్తిగా ఉన్నామని టిక్‌టిక్‌కు చెందిన ప్రతినిధి ఒకరు వ్యాఖ్యానించారు. 

ప్రపంచవ్యాప్తంగా అత్యంత పాపులర్ షార్ట్ వీడియో ప్లాట్‌ఫామ్ టిక్‌టాక్. ఒకప్పుడు భారత్‌లోనూ చాలా క్రేజ్ సంపాదించింది. కోట్లాది మంది యూజర్లను ఆకర్షించింది. చాలా కాలం పాటు టాప్‌లో నిలిచింది. అయితే 2020లో టిక్‌టాక్‌కు ఎదురుదెబ్బ తగిలింది. భారతీయుల డేటాను చైనాకు చేరవేస్తూ దేశ భద్రతకు ముప్పు వాటిల్లే చర్యలు చేస్తోందని టిక్‌టాక్‌ను భారత ప్రభుత్వం నిషేధించింది. దీంతో బైట్‌డ్యాన్స్‌ కు చెందిన టిక్‌టాక్.. ఇండియాలో పూర్తి నిలిచిపోయింది. అయితే టిక్‌టాక్‌ను మళ్లీ భారత్‌లోకి తీసుకురావాలని ఆ సంస్థ ప్రయత్నాలు మొదలుపెట్టినట్టు సమాచారం. ఇందుకోసం ఓ మార్గాన్ని కూడా ఎంచుకుందని తెలుస్తోంది.

భారత్‌కు చెందిన హిరనందని గ్రూప్‌ తో భాగస్వామ్యం ఏర్పరుచుకొని ఇండియాలో టిక్‌టాక్‌ను మళ్లీ లాంచ్ చేయాలని బైట్‌డ్యాన్స్ ఆలోచిస్తోందని ఎకనమిక్స్ టైమ్స్ రిపోర్ట్ వెల్లడించింది. హిరనందని గ్రూప్ ప్రముఖ రియల్ ఎస్టేట్ డెవలపర్స్ సంస్థగా ఉంది. ముంబై, చెన్నై, బెంగళూరు‌లో చాలా ప్రాజెక్టులను చేపడుతోంది. ఇదే సంస్థ యొటా ఇన్‌ఫ్రాస్ట్రక్చర్ సొల్యూషన్స్ కింద డేటా సెంటర్ ఆపరేషన్స్‌ను నడుపుతోంది. టెక్నాలజీ ఆధారిత కస్టమర్ సర్వీస్‌ టెజ్ ప్లాట్‌ఫామ్‌ను లాంచ్ చేసింది. ఈ కంపెనీ భాగస్వామ్యంతో భారత్‌లోనే డేటా స్టోర్ అయ్యేలా చర్యలు తీసుకొని టిక్‌టాక్‌ను రీలాంచ్ చేయాలని బైట్‌డ్యాన్స్ ప్లాన్‌ చేస్తోంది. అయితే ప్రస్తుతం రెండు సంస్థల మధ్య చర్చలు ప్రాథమిక దశలోనే ఉన్నాయి. ఈ ప్లాన్‌ ప్రభుత్వం వరకు వెళ్లిందని సమాచారం. “ఇంకా అధికారిక చర్చలు ఏవీ జరగలేదు. అయితే ఈ ప్లాన్‌ గురించి మాకు సమాచారం వచ్చింది. ఒకవేళ వాళ్లు అనుమతుల కోసం వస్తే.. ఆ అభ్యర్థనను పరిశీలిస్తాం” అని ఓ ప్రభుత్వ అధికారి చెప్పారని ఈటీ పేర్కొంది.

అయితే చైనాతో ఉద్రిక్తతలు అలాగే ఉన్న కారణంగా టిక్‌టాక్‌ను రీలాంచ్ చేసేందుకు బైట్‌డ్యాన్స్‌కు భారత ప్రభుత్వం అనుమతి ఇస్తుందా అన్న విషయంపై స్పష్టత లేదు. అయితే ఇండియన్ యూజర్లతో మళ్లీ కనెక్ట్ అయ్యేందుకు చాలా ఆసక్తిగా ఉన్నామని టిక్‌టిక్‌కు చెందిన ప్రతినిధి ఒకరు వ్యాఖ్యానించారు.

భారత్‌లో డేటా స్టోర్ చేసేలా చర్యలు తీసుకుంటే ప్రభుత్వం అనుమతులు ఇస్తుందన్న సమాచారం ఉంది. “యూజర్లకు చెందిన ముఖ్యమైన డేటా భారత్‌ వెలుపల స్టోర్ చేయకూడదు. అన్ని యాప్స్, వెబ్‌సైట్లు డేటాను దేశీయంగానే స్టోర్ చేసుకునేలా ఏర్పాట్లు చేసుకోవాలి. ఇందుకోసం వారి డేటా స్టోరేజ్, ప్రాసెసింగ్ పాలసీలో మార్పులు చేసుకోవాల్సి ఉంటుంది. ఒకవేళ వారు (టిక్‌టాక్) మళ్లీ రావాలనుకుంటే ఈ విధానాన్ని తప్పక పాటించాలి” అని ఆ అధికారి చెప్పారు. అయితే డేటా స్టోరేజ్ కోసం హిరనందిని గ్రూప్‌తో బైట్‌డ్యాన్స్ చేతులు కలిపేందుకు ప్రయత్నిస్తోంది.

2019లో టిక్‌టాక్‌కు చైనా తర్వాత భారత్‌ అతిపెద్ద మార్కెట్‌గా ఉండేది. ఆండ్రాయిడ్‌ ప్లాట్‌ఫామ్‌లో టాప్‌ డౌన్‌లోడెడ్ యాప్‌గానూ కొనసాగింది. ఎంటర్‌టైన్‌మెంట్‌ మాత్రమే కాకుండా.. కొందరు వీడియో క్రియేటర్లకు టిక్‌టాక్ కాసుల వర్షం కురిపించింది. చాలా మందిని సెలబ్రెటీలుగా మార్చేసింది. దీంతో టిక్‌టాక్ చాలా పాపులర్ అయింది. 2020 జూన్‌లో ఇండియాలో బ్యాన్ అయింది.