అలా ఆరోపించి...ఇలా ఉప సంహరించుకొన్నాడు

భారత ప్రధాని నరేంద్ర మోడీపై ఇటీవల శ్రీలంక అధికారి ఒకరు తీవ్ర వ్యాఖ్యలు చేసిన విషయం తెలిసిందే.   భారత ప్రధాని నరేంద్రీ మోదీ ఒత్తిడి మేరకు మన్నార్ జిల్లాలోని విండ్ పవర్ ప్లాంట్ ప్రాజెక్టును భారతీయ వ్యాపారవేత్త గౌతమ్ అదానీకి అధ్యక్షుడు గొటబాయ రాజపక్స కట్టబెట్టారని శ్రీలంక అధికారి ఆరోపించిన విషయం తెలిసిందే. అయితే, ఆయన తాను పొరపాటున అలా చెప్పానని, వ్యాఖ్యలను ఉపసంహరించుకున్నారు. తాజాగా, సోమవారం తన పదవికి రాజీనామా చేయడం గమనార్హం. అదానీ గ్రూపునకు పవన విద్యుత్ ప్లాంట్‌ను ఇవ్వాలని మోదీ తనపై ఒత్తిడి తెచ్చారని అధ్యక్షుడు తనతో చెప్పారని సిలోన్‌ ఎలక్ట్రిసిటీ బోర్డు (సీఈబీ) ఛైర్మన్‌ ఎంఎంసీ ఫెర్డినాండో రెండు రోజుల కిందట వెల్లడించారు.

దీనిపై రాజకీయ దుమారం రేగందో ఆదివారం తన వ్యాఖ్యలను ఫెర్డినాండో ఉపసంహరించుకున్నారు. అదే సమయంలో శ్రీలంక అధ్యక్షుడు కూడా ఫెర్డినాండో ఆరోపణలను తోసిపుచ్చారు. ఈ నేపథ్యంలో ఫెర్డినాండో తన పదవికి రాజీనామా చేయడం ప్రాముఖ్యతను సంతరించుకుంది. అయితే, శ్రీలంకలోని మన్నార్ జిల్లాలో 500 మెగావాట్ల పునరుత్పాదక ఇంధన ప్రాజెక్టుకు అనుమతులను వేగవంతం చేయాలని ఆ అధికారి లంక ఆర్థిక మంత్రిత్వ శాఖకు రాస్తూ ప్రధానమంత్రి ఆదేశాలను ఉదహరించిన లేఖ ఒకటి బయటకొచ్చింది. ఈ ప్రతిపాదన భారత ప్రభుత్వం నుంచి లంక ప్రభుత్వానికి వచ్చినట్టు నవంబరు 25, 2021న రాసిన లేఖలో స్పష్టంగా ఉంది.

‘‘ప్రస్తుత ఎఫ్‌డీఐ సంక్షోభాన్ని ఎదుర్కొని శ్రీలంకలో ఈ పెట్టుబడిని సాధించేందుకు ఇరు దేశాల అధినేతలు అంగీకారం కుదుర్చుకున్నందున అదానీ గ్రీన్ ఎనర్జీ ప్రతిపాదనను భారత ప్రభుత్వం.. శ్రీలంక ప్రభుత్వానికి ప్రతిపాదనగా గుర్తించాలని ప్రధానమంత్రి ఆదేశించారు’’ అని ఆర్థిక శాఖ ముఖ్య కార్యదర్శి ఎస్ఆర్ అగితాలకు రాసిన లేఖలో పేర్కొన్నారు.

అయితే, ఈ వివాదం పట్ల అదానీ గ్రూప్ తీవ్ర నిరాశ చెందింది. ‘‘శ్రీలంకలో పెట్టుబడులు పెట్టడంలో మా ఉద్దేశం విలువైన పొరుగువారి అవసరాలను తీర్చడమే.. బాధ్యతాయుతమైన కార్పొరేట్‌గా, రెండు దేశాల పరస్పర భాగస్వామ్యంలో ఇది అవసరమైన భాగం అని మేం భావిస్తున్నాం... దీని వల్ల మేము నిరాశ చెందాం.. వాస్తవం ఏమిటంటే ఈ సమస్యను ఇప్పటికే శ్రీలంక ప్రభుత్వం, దాని అంతర్గతంగా పరిష్కరించబడింది’’ అని అదానీ గ్రూప్ ప్రతినిధి చెప్పారు.