ఆ ఉగ్రవాది హతం..నిర్ధారణకు వచ్చిన భద్రతా దళాలు

కశ్మీర్లో సాధారణ పరిస్థితులు కల్పించేందుకు ప్రయత్నిస్తోన్న కేంద్ర ప్రభుత్వం ప్రధాన మంత్రి పునరావాస ప్యాకేజీలో భాగంగా 4 వేల మంది కశ్మీర్ పండిట్లకు లోయలో ఉపాధి అవకాశాలు కల్పించింది. కానీ వారిని చంపేస్తామని బెదిరిస్తోన్న ఉగ్రవాదులు. వరుస హత్యలకు పాల్పడుతున్నారు. దీంతో వారంతా భయపడుతున్నారు. తమను సురక్షిత ప్రాంతాలకు తరలించాలని కోరుతున్నారు.

మరోవైపు జూన్ 2వ తేదీన కశ్మీర్లోని కుల్గాంలోని ఇలాఖై దిహతి బ్యాంకులోకి ప్రవేశించిన ఉగ్రవాది.. రాజస్థాన్‌కు చెందిన బ్యాంక్ మేనేజర్ విజయ్ కుమార్‌ను కాల్చి చంపిన విషయం గుర్తుందా..? ఉగ్రవాది బ్యాంక్ మేనేజర్‌ను కాల్చిన దృశ్యాలు సీసీటీవీ కెమెరాలో రికార్డ్ కాగా ఆ వీడియో సోషల్ మీడియాలో వైరల్ అయ్యింది. కశ్మీర్లో వలస కార్మికులకు రక్షణ లేకుండా పోతోందని ప్రతిపక్షాలు ఆరోపించగా.. అక్కడి నుంచి చాలా మంది వలస జీవులు వెనక్కి వచ్చేశారు.

ఇదిలావుంటే బ్యాంక్ మేనేజర్‌ విజయ్ కుమార్‌ హత్యకు జమ్మూ కశ్మీర్ పోలీసులు ప్రతీకారం తీర్చుకున్నారు. ఆయన్ను కాల్చి చంపిన లష్కరే తొయిబా ఉగ్రవాదిని మట్టుబెట్టారు. బుధవారం తెల్లవారుజామున జరిగిన షోపియాన్ ఎన్‌కౌంటర్లో లష్కరే తొయిబాకు చెందిన ఇద్దరు ఉగ్రవాదులు హతమయ్యారని కశ్మీర్ పోలీసులు వెల్లడించారు. మృతులను తుఫైల్ గనయ్, షోపియాన్‌కు చెందిన జాన్ మహ్మద్ లోనేగా గుర్తించారు. జూన్ 2 కుల్గాంలో బ్యాంక్ మేనేజర్ హత్యలో అతడి ప్రమేయం ఉన్నట్లు తేల్చారు.

బ్యాంకులో లభ్యమైన సీసీటీవీ ఫుటేజీని విశ్లేషించగా.. హతమైంది జాన్ మహ్మద్ లోనేగా నిర్ధారణకు వచ్చామని. అతడి తల్లిదండ్రుతో మాట్లాడిన అనంతరం మరింతగా ధ్రువీకరించుకున్నామని కశ్మీర్ ఐజీపీ తెలిపారు.