అది దొంగ సస్పెన్షన్: నక్కా ఆనంద్ బాబు

సుబ్రహ్మణ్యం హత్య కేసులోవున్న ఎమ్మెల్సీ అనంతబాబును వైసీపీ చేసింది దొంగ సస్పెన్షన్ అని తెలుగు దేశం పార్టీ పోలిట్ బ్యూరో సభ్యుడు, మాజీ మంత్రి నక్కా ఆనంద్ బాబు ఆరోపించారు. దళిత వర్గాలపై జగన్‌ పార్టీది కపట ప్రేమ అని ఆయన విమర్శించారు. తన మాజీ డ్రైవర్ సుబ్రహ్మణ్యాన్ని కొట్టిన చంపిన ఎమ్మెల్సీ అనంతబాబును సస్పెండ్ చేసినట్లు వైసీపీ డ్రామా ఆడిందని ఆరోపించారు. డ్రైవర్ సుబ్రహ్మణ్యం హత్య నేపథ్యంలో వచ్చిన ఉద్యమాన్ని పక్కదారి పట్టించడం కోసమే కోనసీమ జిల్లాలో అల్లర్లు రేపారని నక్కా ఆనంద్ బాబు ఆరోపించారు. ఎమ్మెల్సీ అనంతబాబును హత్య కేసు నుంచి తప్పించేందుకు శతవిధాలా ప్రయత్నించారని.. కుటుంబ సభ్యులు, ప్రతిపక్ష నేతల ఆందోళనలతో కేసు పెట్టక తప్పలేదని వివరించారు. గడప గడపకు ప్రభుత్వం కార్యక్రమంలో.. ఎమ్మెల్సీ అనంతబాబు ఫోటోకు స్థానిక వైసీపీ ఎమ్మెల్యే పాలాభిషేకం చేయటం దొంగ సస్పెన్షన్ కాక మరేంటని ప్రశ్నించారు. అనంతబాబు సస్పెన్షన్‌లో చిత్తశుద్ధి ఉంటే అనంతబాబు ఫోటోలను ఊరేగించిన ఎమ్మెల్యేను కూడా పార్టీ నుంచి సస్పెండ్ చేయాలని డిమాండ్ చేశారు.

ఇక, భారత రాజ్యాంగ నిర్మాత డాక్టర్ బీఆర్ అంబేడ్కర్‌ను అల్లర్లలోకి లాగటం సిగ్గుచేటని నక్కా ఆనంద్ బాబు దుయ్యబట్టారు. దళిత ఓటు బ్యాంక్ వైసీపీకి దూరమవుతున్నందుకే కొత్త కుట్రలకు తెరలేపుతున్నారని విమర్శించారు. పచ్చగా కళకళలాడే కోనసీమను తగలబడటానికి సీఎం జగన్మోహన్ రెడ్డే కారణమని ఆనందబాబు మండిపడ్డారు.

సీఎం కార్యాలయం ఒక పథకం ప్రకారం ఆడిన కుట్ర అనడంలో ఎలాంటి సందేహం లేదన్నారు. ఈ కుట్రలోకి దళిత వర్గాలకు ఆరాధ్యుడైన డాక్టర్ బీఆర్ అంబేడ్కర్‌ను లాగడం శోచనీయమన్నారు. కోనసీమకు అంబేడ్కర్‌ పేరు పెట్టే విధానంలో అక్కడ కుల ఘర్షణలను ముఖ్యమంత్రి జగన్‌ తీసుకొచ్చారని ఆరోపించారు. కోనసీమ అల్లర్లకు ప్రధాన కారణం మంత్రులు, ఎమ్మెల్యేలేనని స్పష్టంగా తెలుస్తున్నా ప్రతిపక్షాలపైకి నెట్టడానికి సీఎం జగన్‌కు సిగ్గు లేదా అని తీవ్ర వ్యాఖ్యలు చేశారు.

ఈ అల్లర్లలో మా పార్టీ కౌన్సిలర్‌ హస్తం ఉందని సాక్షాత్తూ మంత్రి విశ్వరూప్ చెప్పిన విషయం మర్చిపోయారా అని నక్కా ఆనంద్ బాబు ప్రశ్నించారు. మంత్రి చెప్పిన విషయాన్ని సాక్ష్యంగా పోలీసులు తీసుకుంటారా అని నిలదీశారు. కోనసీమ అల్లర్లకు వైసీపీ నేతలను పోలీసులు నిందితులుగా ప్రకటిస్తే.. సీఎం మాత్రం కోనసీమ అల్లర్లపై ప్రతిపక్షాన్ని విమర్శిస్తున్నారని ఆనందబాబు దుయ్యబట్టారు.