మంకీ ఫాక్స్ పేరు మార్చే యోచనలో డబ్ల్యూహెచ్ఓ...కారణం అదేనటా

వ్యాధులకు పేర్లు మార్చడం ఏమిటీ అన్నది మనకు కాస్తంత ఆశ్చర్యం కలిగించవచ్చు. కానీ వ్యాధులు, వైరస్ ల పేర్లు నిర్ణయం వెనక ఓ పెద్ద కథే ఉంటుంది మరి. ఇదిలావుంటే ప్రపంచానికి మంకీపాక్స్ రూపంలో మరో వైరస్ ముప్పు ముంచుకొస్తోంది. ఈ వైరస్‌ దాదాపు 30 దేశాలకు విస్తరించడంతో మంకీపాక్స్ పేరును మార్చాలని ప్రపంచ ఆరోగ్య సంస్థ నిర్ణయించింది. అంతర్జాతీయ శాస్త్రవేత్తల బృందం ఆందోళన వ్యక్తం చేస్తూ లేఖ రాయడంతో స్పందించిన డబ్ల్యూహెచ్ఓ  ఈ నిర్ణయం తీసుకుంది. ప్రపంచంలోని 30 దేశాల్లో 1,600 మందికి మంకీపాక్స్ వైరస్ నిర్ధారణ కాగా.. మరో 1,500 అనుమానిత కేసులు ఉన్నాయి. ఐరోపా దేశాల్లో ఈ వైరస్ కేసులు ఎక్కువగా నమోదవుతున్నాయి.

ఇదిలావుంటే బ్లూమ్‌బెర్గ్ న్యూస్‌కి పంపిన ఇ-మెయిల్‌లో డబ్బ్యూహెచ్ఓ ప్రతినిధి మాట్లాడుతూ.. వ్యాధులకు పేరును సూచించడం వెనుక సాంస్కృతిక, సామాజిక, జాతీయ, ప్రాంతీయ, వృత్తిపరమైన లేదా జాతి సమూహాలను కించపరచకుండా ప్రతికూల ప్రభావాన్ని తగ్గించడమే లక్ష్యం అని చెప్పారు. బ్లూమ్‌బెర్గ్ ప్రకారం.. మంకీపాక్స్‌కు మరింత సముచితమైన పేర్లతో ముందుకు రావడానికి ఆర్థోపాక్స్ వైరస్‌లపై పనిచేస్తున్న నిపుణులతో డబ్ల్యూహెచ్ఓ లోతుగా చర్చిస్తోంది.

మంకీపాక్స్ మూలాలు, అది కలిగించే వ్యాధిని బట్టి వైరస్ పేరు మార్చే అంశంపై ప్రపంచవ్యాప్తంగా ఉన్న భాగస్వాములు, నిపుణులతో కలిసి పనిచేస్తున్నట్టు డబ్ల్యూహెచ్ఓ చీఫ్ టెడ్రోస్ అధ్నామ్ ఘ్యాబ్రియోసిస్ మంగళవారం ప్రకటించారు. వీలైనంత త్వరగా ఈ కొత్త పేరును వెల్లడిస్తామని ఆయన పేర్కొన్నారు. ఈ వైరస్ వ్యాప్తి ప్రపంచానికి ఆందోళన కలిగించే ప్రజారోగ్య అత్యవసర పరిస్థితిని సూచిస్తుందో? లేదో? అంచనా వేయడానికి వచ్చే వారం అంతర్జాతీయ ఆరోగ్య నిబంధనల ప్రకారం అత్యవసర కమిటీని సమావేశపరచాలని మేము నిర్ణయించుకున్నామని వివరించారు.

‘‘మంకీపాక్స్ వైరస్ విషయంలో వివక్షతకు తావులేని విధంగా తక్షణమే కొత్త పేరు అవసరమని జూన్ 10న 30 మంది అంతర్జాతీయ శాస్త్రవేత్తల నుంచి అభ్యర్థన వచ్చింది.. ప్రస్తుత పేరు భౌగోళిక ప్రాంతాలు, జంతువుల పేర్లను నివారించాలని సిఫార్సు చేసే ప్రపంచ ఆరోగ్య సంస్థ మార్గదర్శకాలకు విరుద్దం’’ అని డబ్ల్యూహెచ్ఓ అధికార ప్రతినిధి వ్యాఖ్యానించారు.

ఆర్థోపాక్స్ వైరస్‌ కుటుంబానికి చెందిన మంకీపాక్స్‌కు సరైన పేరును నిర్ణయించే విషయమై శాస్త్రవేత్తలు సంప్రదింపులు జరుపుతున్నారని తెలిపారు. డబ్ల్యూహెచ్ఓ వరల్డ్ ఆర్గనైజేషన్ ఫర్ యానిమల్ హెల్త్, ఐక్యరాజ్యసమితి ఫుడ్ అండ్ అగ్రికల్చర్ ఆర్గనైజేషన్ ఉమ్మడి సిఫార్సుల ప్రకారం.. ప్రమాణాలకు విరుద్ధంగా ఉన్న ఇతర వ్యాధుల పేర్లలో స్వైన్ ఫ్లూ కూడా ఉంది.