అమ్మపై ప్రేమ అలా చేయించింది..అమ్మకోసం ఓ కొడుకు తప్పన

నవమాసాలు మోసిన తల్లిని చూడకుండా వదిలేస్తున్న రోజులివి. పశ్చాత్య పోకడలకు వెళ్లి అమ్మను విస్మరిస్తున్న దుస్థితి. ఈ పరిస్థితుల్లోనూ అమ్మే సర్వం అని నిరూపించాడు ఓ కొడుకు. అమ్మకోసం ఏదైనా చేయాల్సిందేనని సమాజానికి ఓ సంకేతం పంపాడు. అప్పుడప్పుడు మనకు కాలంపై కోపం వస్తూ ఉంటుంది. ఎందుకంటే అది మన అయిన వాళ్లను తీసుకుపోతుంది. ఆ క్షణం మనలో అగ్నిపర్వతం బద్ధలవుతుంది. కన్నీళ్లు సంద్రమవుతాయి. అలాంటి సమయం త్వరలోనే రాబోతోందని తెలుసుకున్న ఓ కొడుకు.. అమ్మ కోసం ఏదైనా చెయ్యాలి అనుకున్నాడు. అతని కథ కన్నీళ్లు తెప్పిస్తోంది. కఠిన హృదయులు కూడా కరిగిపోతున్నారు. ఐఏఎస్ అధికారి అవనీష్ శరణ్ తన ట్విట్టర్ అకౌంట్ @AwanishSharan లో ఈ విషయాన్ని వీడియో రూపంలో జూన్ 26, 2022న షేర్ చేశారు. ఆ తల్లి చివరి కోరిక ఒకటే. తన కొడుకును గ్రాడ్యుయేట్‌గా చూడాలి అనుకుంది. ఆ అనుభవాన్ని స్వయంగా పొందాలి అనుకుంది. ఆస్పత్రి నుంచైనా సరే ఆ దృశ్యాన్ని చూడాలి అనుకుంది. ఆ కోరికను నెరవేర్చాడు కొడుకు. 

వీడియో ప్రకారం స్టెఫానీ నార్త్‌కాట్‌కి రెండేళ్ల కిందట టెర్మినల్ క్యాన్సర్ సోకింది. ఆమె కొడుకు డాల్టన్... తల్లిని కాపాడుకోవడానికి చేసిన ప్రయత్నాలేవీ ఫలించలేదు. దాంతో కనీసం చివరికోరికైనా నెరవేర్చాలి అనుకున్నాడు. ఫ్రెండ్స్, ఫ్యామిలీ, స్కూల్ టీచర్లు అందర్నీ ఆస్పత్రికి తీసుకొచ్చి ఓ గ్రాడ్యుయేషన్ సెరెమనీని నిర్వహించాడు. ఆస్పత్రిలోని ఛాపెల్‌లో ఈ కార్యక్రమం జరిగింది. అందరూ చూస్తుండగా గ్రాడ్యుయేషన్ పొందినట్లు చేశాడు. ఆ దృశ్యం చూసి తల్లి ఎంతో ఆనందపడింది. తర్వాత తల్లితో డాన్స్ కూడా చేశాడు. ఈ సెరెమనీ జరిగిన వారం తర్వాత ఆమె చనిపోయింది. ఈ వీడియోని ఇప్పటికే 92 వేల మందికి పైగా చూడగా 4.7 వేల మందికి పైగా లైక్ చేశారు. ఈ వీడియో చూసి భావోద్వేగం చెందుతున్న నెటిజన్లు... తమ అభిప్రాయాలు చెబుతున్నారు. "కళ్లలో నీళ్లు తిరుగుతున్నాయి. నాకు మాటలు రావట్లేదు" అని ఓ యూజర్ స్పందించగా.. "హార్ట్ టచింగ్" అని మరో యూజర్ కామెంట్ ఇచ్చారు.

"మనం దేవుణ్ని నిజంగా చూడలేకపోవచ్చు. కానీ అమ్మ రూపంలో చూస్తున్నాం. తల్లులు తమ పిల్లల కోసం ఏమైనా చేస్తారు. వారు తమ పిల్లలు ప్రమాదంలో ఉన్నప్పుడు రెండో ఆలోచన లేకుండా కాపాడతారు" అని మరో యూజర్ స్పందించారు. "ఆ అబ్బాయికి అవి అత్యంత బాధాకరమైన రోజులు. అతని పరిస్థితి దారుణం. ఇలాంటి పరిస్థితి ఎవరికీ రాకూడదు. ముఖ్యంగా తల్లిదండ్రులు చనిపోతారని ముందే తెలిసి.. ప్రతీక్షణం అదే ఆలోచనతో ఉండాల్సి రావడం అత్యంత బాధాకరం" అని మరో యూజర్ కామెంట్ ఇచ్చారు.