ఇక 15 నిమిషాల్లోనే రుణం...ఎక్కడో తెలుసా

రుణం పొందాలంటే బ్యాంకుల చుట్టూ చెప్పులు అరిగేలా తిరగాలి అని ఎవరైనా సరే ఇట్టే చెప్పేస్తారు. కానీ దక్షిణ కొరియాకు చెందిన బ్యాంకు మాత్రం రుణం సులువుగానే..అందులోనూ కేవలం 15 నిమిషాల లోపే అందిస్తామని వెల్లడించింది. దక్షిణ కొరియాకు చెందిన నాన్ బ్యాంకింగ్ ఫైనాన్షియల్ సర్వీసెస్ సంస్థ మిరే అసెట్ ఫైనాన్షియల్ సర్వీసెస్ తాజాగా తీపికబురు అందించింది. మ్యూచువల్ ఫండ్స్‌లో ఇన్వెస్ట్ చేసే వారికి ఊరట కలిగే నిర్ణయం తీసుకుంది. మ్యూచువల్ ఫండ్స్‌పై రుణాలు అందించే వ్యాపారంలోకి అడుగు పెట్టింది. అంతేకాకుండా కొత్త మొబైల్ యాప్‌ను కూడా తీసుకువచ్చింది. లోన్ అగెనెస్ట్ మ్యూచువల్ ఫండ్స్ (ఎల్ఏఎంఎఫ్) సర్వీసులు ఈ యాప్ ద్వారా పొందొచ్చు. ఈ యాప్ సాయంతో అర్హత కలిగిన వారు నిమిషాల వ్యవధిలోనే రుణం పొందొచ్చని సంస్థ తెలియజేస్తోంది. కాగా మిరే అసెట్ ఫైనాన్షియల్ సర్వీసెస్ అనేది మిరే అసెట్ గ్రూప్‌నకు చెందిన కంపెనీ.

పరిశ్రమలో ఇది వరకు లేని విధంగా డిజిటల్ మార్గంలో పేపర్‌లెస్ విధానంలో త్వరితగతిన ఎల్ఏఎంఎఫ్ రుణాలు అందిస్తున్నామని కంపెనీ తెలిపింది. కస్టమర్లు ఓవర్ డ్రాఫ్ట్ ఫెసిలిటీ కింద రుణాన్ని పొందొచ్చు. కస్టమర్లు ఎప్పుడైనా, ఎక్కడైనా ఈ మొబైల్ యాప్ ద్వారా రుణ సౌకర్యం పొందే వీలుంటుంది. రూ. 50 వేల నుంచి రూ. 3 కోట్ల వరకు రుణాన్ని పొందొచ్చు. మ్యూచువల్ ఫండ్ ఇన్వెస్ట్‌మెంట్ల ప్రాతిపదికన రుణ మొత్తం కూడా మారుతుంది.

ఓవర్ డ్రాఫ్ట్ ఫెసిలిటీ కావడం వల్ల డబ్బులు ఎప్పుడు అవసరం అయితే అప్పుడు బ్యాంక్ అకౌంట్‌కు ట్రాన్స్‌ఫర్ చేసుకోవచ్చు. రుణం పొందడం, తిరిగి చెల్లించడం సహా పలు రకాల సర్వీసులను ఈ యాప్ ద్వారా పొందొచ్చు. 15 నిమిషాల్లోనే రుణం పొందొచ్చని కంపెనీ తెలియజేస్తోంది. వ్యాపారం, హోమ్ రెనొవేషన్, స్వల్ప కాలిక అవసరాలు, మెడికల్ ఎమర్జెన్సీ వంటి వాటికి ఈ తరహా రుణాలు తీసుకోవచ్చు. ఇన్వెస్ట్‌మెంట్లు అలానే ఉంటాయి. విత్‌డ్రా చేసుకోకుండానే రుణం రూపంలో డబ్బులు పొందొచ్చు. తర్వాత లోన్ డబ్బులు చెల్లిస్తే సరిపోతుంది.

లెండింగ్ బిజినెస్‌లో కీలక నిర్ణయం తీసుకున్నామని మిరే అసెట్ గ్లోబల్ ఇన్వెస్ట్‌మెంట్స్ (ఇండియా) డైరెక్టర్ స్వరూప్ మొహంతీ తెలిపింది. టీమ్ చాలా కష్టపడిందని పేర్కొంది. కస్టమర్లకు ఎప్పుడు అవసరం అయితే అప్పుడు డబ్బులు పొందటానికి వీలుగా ఈ సర్వీసులు అందుబాటులోకి తెచ్చామని పేర్కొంది. కస్టమర్లు వారి ఆర్థిక లావాదేవీలను సామర్థవంతంగా నిర్వహించుకోవచ్చని తెలిపింది. కొత్త సర్వీసుల వల్ల మ్యూచువల్ ఫండ్స్‌ కలిగిన వారికి ప్రయోజనం కలుగనుంది.