హిందూ ధర్మాన్ని ఆ పార్టీ ఏమైనా లీజుకు తీసుకుందా: టీఎంసీ ఎంపీ మండిపాటు

హిందూ ధర్మాన్ని ఆ పార్టీ ఏమైనా లీజుకు తీసుకుందా అని బీజేపీపై టీఎంసీ ఎంపీ మహువా మొయిత్రా తీవ్రంగా మండిపడింది. కాళీమాత పోస్టర్‌కు మద్దతుగా నిలిచి.. అనుచిత వ్యాఖ్యలు చేసిన ఆమె ఇప్పటికే అనేక విమర్శలు ఎదుర్కొంటున్నారు. ఈ క్రమంలో మళ్లీ ఆమె బీజేపీపై పలు ఆరోపణలు చేశారు. హిందూ ధర్మాన్ని ఆ పార్టీ ఏమైనా లీజుకు తీసుకుందా..? అని ప్రశ్నించారు. ఆ పార్టీ దేవుళ్లకు ఎలా ప్రార్థనలు చేయాలో ఇతరులకు ఎందుకు నేర్పుతోందని అడిగారు. ఓ న్యూస్ ఛానల్లో మాట్లాడిన మహువా ఈ వ్యాఖ్యలు చేశారు. బీజేపీ తన ఎజెండాను, అభిప్రాయాలను బలవంతంగా ఇతరులపై రుద్దేందుకు ప్రయత్నిస్తోందని, అందరూ దీనిని ప్రతిఘటించి దేశం కోసం ఒక్కసారి మాట్లాడాలని మహువా అన్నారు.

బీజేపీ నుంచి ఎదురవుతున్న విమర్శల నేపథ్యంలో ఆమె ఈ విధంగా స్పందించారు. ఆమెను టీఎంసీ నుంచి సస్పెండ్ చేయాలని బీజేపీ డిమాండ్ చేస్తుంది. నిజానికి ఓ డాక్యుమెంటరీకి సంబంధించిన పోస్టర్‌ను డైరక్టర్ లీనా మణిమేకలై పోస్టర్‌ను విడుదల చేయగా.. పెద్ద దుమారాన్ని రేపింది. అందులో కాళీమాత వేషదారణలో ఉన్న నటి ఒక చేత్తో త్రిశూలం పట్టుకుని, మరో చేత్తో సిగరెట్ తాగుతున్నట్టు ఉండడంతో చాలా విమర్శలు వచ్చాయి. ఒక దేవతను అలా చూపించడంపై ఆగ్రహం వ్యక్తం అయింది. దానిపై స్పందించిన ఎంపీ మహువా మొయిత్రా ఆ హీట్‌ను మరింత పెంచారు. తనకు సంబంధించినంత కాళీకాదేవి మాంసాహారం, మద్యం స్వీకరించే దేవతేనని అన్నారు. దాంతో మహువాపై కూడా హిందూ సంఘాలు, బీజేపీ నేతలు మండిపడుతున్నారు.

ఈ నేపథ‌్యంలో బీజేపీ ఇతర ప్రాంతాల ప్రజలపై తన ఎజెండాను రుద్దడం మానాలని, బెంగాల్లో హిందువులు శతాబ్దాలుగా తమ సుస్థిరమైన ఆచారాలను పాటిస్తున్నారని మహువా అన్నారు. "కాళీ మాత పూజను ప్రత్యేక పద్ధతిలో ఎలా నిర్వహించాలో మాకు నేర్పడానికి బీజేపీ ఎవరు..? రాముడు లేదా హనుమంతుడు బీజేపీకి చెందినవారు కాదు. పార్టీ హిందూ ధర్మాన్ని లీజుకు తీసుకుందా?" అని ఎంపీ మహువా మొయిత్రా ప్రశ్నించారు. అంతేకాదు తమ దేవతను ఎలా పూజించాలో.. బీజేపీ తమకు నేర్పించక్కర్లేదని, గత రెండు వేల సంవత్సరాలుగా తాము దేవతను అదే విధంగా పూజిస్తున్నామని ఎంపీ మహువా అన్నారు.