విహెచ్పీ, బజరంగ్ దళ్ ఫిర్యాదుతో..ఆ శివుడు అరెస్ట్
national | Suryaa Desk | Published : Mon, Jul 11, 2022, 04:30 PM
ధరల పెరుగుదలపై నిరసనకు ఓ వ్యక్తి ప్రత్యేక పంథాను ఎంచుకొన్నాడే. అదే అతనిపాలిట శాపమైంది. చివరకు అరెస్టు అయ్యాడు. ద్రవ్యోల్బణం, ధరల పెరుగుదలకు నిరసనగా పరమశివుడి వేషం వేసుకుని వీధినాటకంతో నిరసన తెలిపిన వ్యక్తిని పోలీసులు అరెస్ట్ చేశారు. హిందువుల మనోభావాలను దెబ్బతీశాడంటూ విశ్వహిందూ పరిషత్, బజరంగ్ దళ్ సంస్థల ఫిర్యాదుతో పోలీసులు అతడిని అరెస్ట్ చేసి కటకటాల వెనక్కి పంపారు. అసోంలోని నాగావ్లో జరిగిందీ ఘటన. ధరల పెరుగుదలను నిరసిస్తూ బిరించి బోరా అనే వ్యక్తి శివుడి వేషం ధరించి పార్వతి వేషధారితో కలిసి వీధినాటకం వేశాడు. దీనిని తీవ్రంగా పరిగణించిన వీహెచ్పీ, బజరంగ్ దళ్.. హిందువుల మనోభావాలను దెబ్బతీశారంటూ వారిపై పోలీసులకు ఫిర్యాదు చేశారు. దీంతో బిరించి బోరాను పోలీసులు అదుపులోకి తీసుకున్నారు. బోరాను అరెస్ట్ చేయడంపై సోషల్ మీడియాలో పెద్ద ఎత్తున విమర్శలు వచ్చాయి. దీంతో జోక్యం చేసుకున్న ముఖ్యమంత్రి హిమంతబిశ్వ శర్మ ఆదేశాల మేరకు బిరించిన పోలీసులు విడుదల చేశారు.
|
|