బీజేపీ, టీడీపీ నేతల మధ్య నవ్వులు పూయించిన చంద్రబాబు
Andhra Pradesh Telugu | Suryaa Desk | Published : Tue, Jul 12, 2022, 11:04 PM
ఎపుడూ సీరియస్ గా ఉండే చంద్రబాబులోనూ ఓ చమత్కారీ ఉన్నాడండోయ్. కాకపోతే సందర్భం రావాలి మరి. అలాంటి సందర్భమే రాష్ట్రపతి అభ్యర్థి ద్రౌపది ముర్ము రాక సందర్భంగా నెలకొంది. ఎన్డీయే అభ్యర్థి ద్రౌపది ముర్ము ఈ నెల 18న జరిగే రాష్ట్రపతి ఎన్నికల్లో తన అభ్యర్థిత్వానికి వైసీపీ, టీడీపీ నేతల మద్దతు కోరేందుకు ఏపీకి వచ్చారు. వైసీపీ ప్రజాప్రతినిధులతో భేటీ అనంతరం, విజయవాడ తాజ్ గేట్ వే హోటల్లో టీడీపీ ప్రజాప్రతినిధులను కలిశారు. ఇదిలావుంటే ఈ కార్యక్రమంలో టీడీపీ అధినేత చంద్రబాబుతో బీజేపీ ఏపీ అగ్రనేతలు జీవీఎల్ నరసింహారావు, సోము వీర్రాజు మాట్లాడడం అందరి దృష్టిని ఆకర్షించింది.
ముఖ్యంగా, చంద్రబాబుతో జీవీఎల్ సరదాగా సంభాషించారు. 'చంద్రబాబు గారూ మీరు బాగా బరువు తగ్గారు' అంటూ జీవీఎల్ పేర్కొన్నారు. అందుకు చంద్రబాబు చమత్కారంగా బదులిచ్చారు. "అప్పట్లో 70 కేజీలకు పైబడి ఉంటే, ఇప్పుడు 60 కేజీలకు పైబడి ఉన్నా" అంటూ సరదాగా సమాధానమిచ్చారు. దాంతో అక్కడ నవ్వులు విరబూశాయి. ఇదిలావుంటే తన ఏపీ పర్యటన ముగించుకున్న ద్రౌపది ముర్ము ప్రత్యేక విమానంలో ఢిల్లీకి బయలుదేరి వెళ్లారు.
|
|