ఈ వర్షాల్లో గర్బీణీలకు ఇబ్బందులు తలెత్తకుండా...వినూత్నంగా ఆలోచించిన కలెక్టర్

జిల్లా కలెక్టర్ అంటే జిల్లా మొత్తానికి పాలనాధికారి. ఈ బాధ్యతను గుర్తించిన ఓ కలెక్టర్ తన జిల్లాలోని గర్భీణీలు  భారీ వర్షాల  కారణంగా ఎలాంటి ఇబ్బందులు పడకూడదని భావించాడు. ఇందుకోసం ఓ మహోన్నత కార్యక్రమానికి ఆయన శ్రీకారం చుట్టారు. కష్టాల్లో సాయం అందించే వారు గొప్పవాళ్లవుతారు. మరి ఆ కష్టాన్ని.. రాక ముందే ఊహించి, కాపాడే వాళ్లను ఏమనాలి? దేవుడిగా కీర్తిస్తారేమో..! మహబూబాబాద్ కలెక్టర్ కె శశాంక ఇప్పుడు ఇలాగే కీర్తి పొందుతున్నారు. రాష్ట్రాన్ని భారీ వర్షాలు ముంచెత్తుతున్న వేళ సహాయక చర్యల్లో భాగంగా ఆయన (ఒక అడుగు ముందుకేసి వినూత్న ఆలోచన చేశారు.ఏజెన్సీ ప్రాంతాల ప్రజలకు మాములు రోజుల్లోనే ఇబ్బందులు తప్పవు. ఇక వర్షాకాలం.. అడుగు తీసి బయట పెట్టాలంటేనే భయం. ఎక్కడ ఏ వాగు పొంగి పొర్లుతుందో..? ఎక్కడ నుంచి వరద వచ్చి ముంచెత్తుతుందో..?! అలాంటి పరిస్థితుల్లో గర్భిణులకు పురుటినొప్పులు వస్తే..? అత్యవసరంగా వైద్య సాయం అందాల్సిన వారుంటే..? ఆ కష్టాలను ఊహించుకోవడమే కష్టంగా ఉంది కదా..! భారీ వర్షాలు కురుస్తున్న తరుణంలో గర్భిణులు అలాంటి కష్టాలు పడొద్దని మహబూబాబాద్‌ కలెక్టర్ శశాంక జిల్లా యంత్రాంగానికి ముందస్తు సూచనలను జారీ చేశారు. రెండు వారాల లోపు డెలివరీ అయ్యే అవకాశం ఉన్నవారిని గుర్తించి స్థానిక ఆరోగ్య కేంద్రాలకు తరలించాలని సూచించారు.

కలెక్టర్ ఆదేశాలతో మహబూబాబాద్ జిల్లావ్యాప్తంగా గర్భిణులను గుర్తించి ఆరోగ్య కేంద్రాలకు తరలించారు వైద్య సిబ్బంది. కొంత మందిని వారి ఇష్టం ప్రకారం, రోడ్డు సౌకర్యం సక్రమంగా ఉన్న వారి బంధువుల ఇళ్లకు తరలించారు. జిల్లా వ్యాప్తంగా 21 పీహెచ్‌సీల పరిధిలో 131 మంది గర్భిణులను తరలించినట్లు వైద్యాధికారులు తెలిపారు. 108, 102 వాహనాల్లో ఏఎన్‌ఎంలు, ఆశా కార్యకర్తల సాయంతో వీరందరినీ తరలించారు.