ఏటీఏం డ్రాపై...సర్వీసు ఛార్జ్ రూ.23 మాత్రమే వసూలు: కేంద్రం స్పష్టీకరణ

ఏటీఎం విత్ డ్రాలపై వేసే సర్వీసు ఛార్జీల విషయంలో కేంద్రం స్పష్టతనిచ్చింది. ఏటీఎం మెషిన్ నుంచి నాలుగు సార్లకు మించి డబ్బులు విత్‌డ్రా చేస్తే.. సేవింగ్స్ అకౌంట్ ఖాతాదారునిపై ఒక్కో లావాదేవీపై రూ.173 ఛార్జీను విధిస్తున్నారని ఇటీవల ఒక న్యూస్ బాగా సర్క్యూలేట్‌ అవుతోంది. ఆ వార్తపై కేంద్ర ప్రభుత్వం క్లారిటీ ఇచ్చింది. ఆ వార్త పూర్తిగా తప్పుడు వార్త అని ప్రెస్ ఇన్‌ఫర్మేషన్ బ్యూరో ఫ్యాక్ట్ చెక్ ద్వారా తెలిపింది. మీ బ్యాంకు ఏటీఎం నుంచి ప్రతి నెలా ఉచితంగా ఐదు లావాదేవీలు చేసుకోవచ్చని చెప్పింది. ఐదు ఉచిత లావాదేవీల తర్వాత.. ప్రతి లావాదేవీకి రూ.21 లేదా ఏదైనా పన్ను ఉంటే దాన్ని సెపరేట్‌గా చెల్లించాల్సి ఉంటుందని ట్విటర్ ద్వారా వెల్లడించింది. దీనిపై ఆర్‌బీఐ జారీ చేసిన సర్క్యూలర్ లింక్‌ను కూడా ప్రెస్ ఇన్‌ఫర్మేషన్ బ్యూరో(పీఐబీ) షేర్ చేసింది.

ఇదిలావుంటే కస్టమర్లు ప్రతి నెలా తమ సొంత బ్యాంకు ఏటీఎంల నుంచి ఐదు లావాదేవీలను ఉచితంగా చేసుకోవచ్చు. అలాగే ఇతర బ్యాంకు ఏటీఎంలైతే.. మెట్రో సెంటర్లలో మూడు, నాన్ మెట్రోల్లో అయితే ఐదు లావాదేవీలు చేసుకునేందుకు అనుమతి ఉంటుంది. ఈ పరిమితి దాటిన తర్వాత... ఆగస్టు 14, 2014న జారీ చేసిన సర్క్యూలర్ ప్రకారం.. ప్రతి లావాదేవీపై రూ.20 ఛార్జీ విధించే వారు. కానీ ఈ కస్టమర్ ఛార్జీలను జనవరి 1, 2022న సమీక్షించారు. అప్పటి నుంచి ఒక్కో లావాదేవీపై ఛార్జీని రూ.21కు పెంచారు.

సోషల్ మీడియాలో సర్క్యూలేట్ అవుతోన్న వార్త ప్రకారం.. 4 సార్లకు మించి ఏటీఎం నుంచి డబ్బులను విత్ డ్రా చేస్తే రూ.173 మీ అకౌంట్‌ నుంచి కట్ అవుతున్నాయని పేర్కొంది. దానిలో రూ.150 ట్యాక్స్‌, రూ.23 సర్వీసు ఛార్జీలున్నట్టు తెలిపింది. ఈ వార్తను ప్రతి ఒక్కరికీ ఫార్వర్డ్ చేయాలని సోషల్ మీడియాలో పేర్కొంటున్నారు. దీంతో వెంటనే ప్రభుత్వం దీనిపై స్పందించింది. ప్రతి నెలా 5 ఏటీఎం లావాదేవీలు ఉచితంగా అందిస్తున్నట్టు తెలిపింది. ఆ తర్వాత కూడా కేవలం ప్రతి లావాదేవీపై రూ.21 మాత్రమే ఛార్జ్ చేస్తున్నట్టు చెప్పింది.