రూపాయి పతనం నేపథ్యంలో నిబంధనలను సడలించిన ఆర్బీఐ...భారీగా పెరిగిన వడ్డీ రేట్లు

విదేశీ డిపాజిటర్లకు ఇది నిజంగా శుభవార్తే. దేశంలోని దిగ్గజ బ్యాంకులు ఎస్‌బీఐ, ఐసీఐసీఐ బ్యాంకు, ఐడీఎఫ్‌సీ బ్యాంకులన్ని విదేశీ కరెన్సీ నాన్-రెసిడెంట్ డిపాజిట్ల వడ్డీ రేట్లను పెంచాయి. ఇదిలావుంటే ఇదిలావుంటే పడిపోతున్న రూపాయి వాల్యూను కాపాడేందుకు దేశంలో ఫారిన్ ఎక్స్చేంజ్ నిల్వలకు బూస్టప్ ఇచ్చేందుకు ఆర్‌బీఐ ఈ నెల 6వ తేదీన తన నిబంధనలను కాస్త మేర సడలించింది. ఈ నిబంధనల సడలింపు తర్వాత బ్యాంకులలో విదేశీ కరెన్సీల వడ్డీ రేట్లు పెరిగాయి. విదేశీ నిల్వల రాకను పెంచేందుకు గత వారమే రిజర్వు బ్యాంకు ఆఫ్ ఇండియా సడలింపులను ప్రకటించింది. ఈ సడలింపుల అనంతరం బ్యాంకులు ఈ విదేశీ కరెన్సీల డిపాజిట్ రేట్లను పెంచాయి. దేశంలో అతిపెద్ద ప్రైవేట్ రంగ బ్యాంకు అయిన హెచ్‌డీఎఫ్ఐ బ్యాంకు ఫారిన్ కరెన్సీ డిపాజిట్ రేట్లను సమీక్షిస్తున్నట్టు ప్రకటించింది. ఇది కేవలం ఆర్‌బీఐ తాజా సడలింపుల వల్లనే కాదని, మున్ముందు కూడా ఈ వడ్డీ రేట్లను మరింత పెంచుతామని హెచ్‌డీఎఫ్‌సీ బ్యాంకు ప్రకటించింది.

ప్రభుత్వ రంగానికి చెందిన అతిపెద్ద బ్యాంకు స్టేట్ బ్యాంకు ఆఫ్ ఇండియా కూడా ఈ ఫారిన్ కరెన్సీ నాన్ రెసిడెంట్ డిపాజిట్ రేట్లను సమీక్షించింది. జూలై 10,2022 నుంచి పలు టెన్యూర్ల డాలర్ డిపాజిట్లపై ఏడాదికి 2.85 శాతం నుంచి 3.25 శాతం మధ్యలో వడ్డీ రేట్లను ఆఫర్ చేస్తున్నట్టు పేర్కొంది. ఏడాది టెన్యూర్ కలిగిన ఫారిన్ కరెన్సీ నాన్ రెసిడెంట్ డాలర్ డిపాజిట్ రేట్లను 1.80 శాతం నుంచి 2.85 శాతానికి పెంచింది. మూడేళ్ల నుంచి నాలుగేళ్లు, ఐదేళ్ల టెన్యూర్ కలిగిన డిపాజిట్లకు 3.10 శాతం, 3.25 శాతం వడ్డీ రేట్లను పెంచుతున్నట్టు పేర్కొంది. అంతకముందు ఈ రేట్లు 2.30 శాతంగా, 2.45 శాతంగా ఉండేవి.

ఐసీఐసీఐ బ్యాంకు కూడా 12 నుంచి 24 నెలల టెన్యూర్ కలిగిన 3,50,000 డాలర్ల ఫారిన్ కరెన్సీ నాన్ రెసిడెంట్ డిపాజిట్లకు వడ్డీ రేట్లను 0.15 శాతం పెంచి 3.50 శాతానికి చేర్చింది. ఈ కొత్త రేటును నేటి(జూలై 13, 2022) నుంచే అమల్లోకి తెస్తోంది. ఏడాది నుంచి రెండేళ్ల కంటే తక్కువ కాల వ్యవధి కలిగిన యూఎస్‌డీ డిపాజిట్లపై వడ్డీ రేట్లను ఈ నెల 9 నుంచి 3.35 శాతానికి పెంచుతున్నట్టు హెచ్‌డీఎఫ్‌సీ బ్యాంకు పేర్కొంది.

ఈక్విటాస్ స్మాల్ ఫైనాన్స్ బ్యాంకు కూడా నాన్ రెసిడెంట్ ఎక్స్‌టర్నల్ అకౌంట్ రికరింగ్, ఫిక్స్‌డ్ డిపాజిట్ల వడ్డీ రేట్లను నేటి నుంచి సమీక్షించింది. 888 రోజులకు నాన్ రెసిడెంట్ ఎక్స్‌టర్నల్ ఫిక్స్‌డ్ డిపాజిట్ల వడ్డీ రేట్లు 7.40 శాతం వరకు పెరిగాయి. 36 నెలలకు చెందిన ఎన్‌ఆర్ఈ రికరింగ్ డిపాజిట్ల వడ్డీ రేట్లు 7.30 శాతం వరకు ఎగిశాయి.