బాహుబలిని గంగా నదిని దాటించిన ఏనుగు

కొన్ని చిత్రాలు సినిమాల్లోనే చూసేందుకు అవకాశమున్నా అపుడపుడు చమత్కారంలా అవి మన సాధారణ జీవనంలోనూ దర్శనమిస్తుంటాయి. ఎవ్వడంట ఎవ్వడంటా నిన్ను ఎత్తుకుంది? ఏ తల్లికి పుట్టాడో ఈ నంది కాని నందీ.. ఎవ్వరూ కనందీ ఎక్కడా వినందీ.. బాహుబలి సినిమాలో ఈ పాట గుర్తొచ్చిందా? ఈ పాట వినగానే.. గంగ దరికి భారీ లింగాన్ని ఎత్తుకొని తీసుకొచ్చే బాహుబలి గుర్తుకొస్తాడు కదా! ఆ తర్వాత ఈ స్టోరీ బ్యాక్ డ్రాప్‌‌లో భాగంగా ఏనుగుతో కలిసి బాహుబలి చేసే విన్యాసాలు మరింత ఆకట్టుకుంటాయి. అది బాహుబలి వీరత్వాన్ని ఆవిష్కరిస్తుంది. అయితే, అది సినిమా. ఇప్పుడు గంగా నదిలో మావటిని ఎక్కించుకొని తీరం వైపు కదిలొస్తున్న ఓ గజరాజును చూస్తుంటే.. ఈ పాట మళ్లీ గుర్తుస్తోంది. ఈ వాస్తవ సంఘటన బాహుబలి ధీరత్వానికి ఏమాత్రం తీసిపోని విధంగా ఉంది.

దేశంలోని పలు రాష్ట్రాల్లో భారీ వర్షాలు కురుస్తున్నాయి. నదులు, వాగులకు ఆకస్మికంగా వరదలు వచ్చి ఉప్పొంగుతున్నాయి. బిహార్‌లోని వైశాలి జిల్లాలో గంగా నది కూడా ఇలాగే ఉప్పొంగింది. అయితే, ఆ ప్రమాదాన్ని ఊహించని ఓ వ్యక్తి మంగళవారం (జులై 12) ఉదయం తన ఏనుగును తీసుకొని ఎప్పట్లాగే రఘోపూర్‌లోని గంగా నది తీరానికి వెళ్లాడు. ఆ తర్వాత కొన్ని గంటలకే గంగా నదికి ఆకస్మిక వరదలు వచ్చాయి. కొంత సమయం గడిస్తే వరద తగ్గుతుందేమో అని భావించాడు. కానీ, అలా జరగకపోగా.. వరద ఉధృతి తీవ్రమైంది.

సాధారణంగా ఇంకొకరెవరైనా అయితే, ఓ బోటును రప్పించుకొని దాని సాయంతో ప్రవాహం దాటేవారు. కానీ, పేద వాడైన ఆ మావటికి అంత స్థోమత లేదు. కనీసం ఆ ఆలోచన కూడా చేయలేదు. తనకు తెలిసిన జీవిత పాఠం ‘పోరాటాన్నే’ నమ్ముకున్నాడు. ఆ ప్రవాహాన్ని ఎదుర్కొనేందుకు సిద్ధమయ్యాడు. తన ఏనుగు పైకెక్కి కూర్చొని, ముందుకు వెళ్లాలని ఆదేశించాడు.

తన గురువు నమ్మకాన్ని ఆ ఏనుగు వమ్ము చేయలేదు. ఓడిపోనివ్వలేదు. ఎగిసి పడుతున్న ప్రవాహాన్ని ఎదురించి అడుగు ముందుకేసింది. తాను నిలువునా మునుగుతున్నా వెనకడుగు వేయలేదు. ఒక దశలో ఆ ఏనుగు, మావటి.. నీటి ప్రవాహంలో పూర్తిగా మునిగిపోయారు. ఆవలి వైపున ఉన్న వాళ్లు ఏం జరుగుతుందా అని ఉత్కంఠగా చూస్తున్నారు. చిన్నారి బాహుబలిని ప్రవాహం దాటించిన శివగామిలా.. ప్రవాహం నుంచి ఆ ఏనుగు పైకి లేచింది. అలా కిలోమీటరుకు పైగా దూరాన్ని ప్రవాహానికి ఎదురీదుకుంటూ మావటిని ఒడ్డుకు చేర్చింది.

ఇప్పుడీ వీడియో సోషల్ మీడియాలో వైరల్ అవుతోంది. ఆ గజరాజంపై ప్రశంసల వర్షం కురుస్తోంది. బలిబలిబలి బాహుబలి.. సాహో రే బాహుబలి..! ఆ ఏనుగుకు, మావటి ధైర్యానికి హ్యాట్సాఫ్ చెప్పాల్సిందే కదూ..!