అడ్డదారిలో వెళ్లి ముందుకెళ్లలేక ఆగిపోయిన స్కార్పియో...తెరిచిచూస్తే

పోలీసులు, అధికార్లు ఎన్ని చర్యలు తీసుకొన్న అక్రమార్కుల ఆగడాలు మాత్రం ఆగడంలేదు. చెక్‌పోస్టు నుంచి తప్పించుకోవడానికి అడ్డదారిలో వెళ్లారు. ఆ దారిలో ఒక ట్రాక్టర్ ఆగిపోయి ఉండటంతో ముందుకు వెళ్లలేక.. వెనక్కి రాలేక రెండు స్కార్పియోలను అక్కడే వదిలేసి పరారయ్యారు. తీరా ఆ స్కార్పియో డోర్లు ఓపెన్ చేస్తే అందులో ఏకంగా వెయ్యి కేజీల గంజాయి ఉంది. దీంతో ఆశ్చర్యపోయిన స్థానిక గిరిజనులు పోలీసులకు, ఎక్సైజ్ అధికారులకు సమాచారం ఇచ్చారు. ఈ ఘటన అల్లూరి సీతారామరాజు మన్యం జిల్లా అరుకులోయ నియోజకవర్గంలో చోటుచేసుకుంది.

గురువారం రాత్రి రెండు స్కార్పియోలలో వెయ్యి కేజీల గంజాయిని తీసుకొని అరకులోయ వైపు నుంచి స్మగ్లర్లు బయలుదేరారు. అనంతగిరి మండలం చిలకలగడ్డ వద్ద ఉన్న చెక్‌పోస్ట్‌ను దాటడం అసాధ్యం కాబట్టి అడ్డదారిలో ప్రయాణించారు. అయితే, ఆ దారిలో చిలకలగడ్డ పంచాయతీ వెంకయ్యపాలెం గ్రామం సమీపంలో రోడ్డుకు అడ్డంగా ట్రాక్టర్ ఆగిపోయింది. దీంతో ముందుకు ఎలా వెళ్లాలో తెలియక.. వెనక్కి తిప్పి వెళ్లలేక స్కార్పియోలను అక్కడే వదిలి స్మగ్లర్లు పారిపోయారు.

రోడ్డు పక్కన ఆపి ఉన్న రెండు స్కార్పియోలను శుక్రవారం ఉదయం వెంకయ్యపాలెం గిరిజనులు గమనించారు. వాటి డోర్లు ఓపెన్ చేసి చూడగా అందులో భారీ ఎత్తున గంజాయి ప్యాకెట్లు ఉన్నాయి. ఇవి సుమారు వెయ్యి కేజీలు ఉంటాయని అంచనా. ఈ విషయాన్ని వెంటనే వారు ఎక్సైజ్, సివిల్ పోలీసులకు తెలియజేశారు. రంగంలోకి దిగిన పోలీసులు ఇంత పెద్ద మొత్తంలో గంజాయి ఎక్కడి నుంచి సేకరించారు.. ఎక్కడికి తీసుకెళ్తున్నారు.. అసలు ఈ గంజాయి స్మగ్లర్లు ఎవరు అనే కోణంలో పోలీసులు దర్యాప్తు చేస్తున్నారు.