మీ భాగస్వామలును తగ్గింకోండి...కొత్త భాగస్వామలును ఎంచుకోండి: డబ్ల్యూహెచ్ఓ

ప్రపంచవ్యాప్తంగా అలజడికి గురిచేస్తున్న మంకీ ఫాక్స్ పుట్టకకు స్వలింగ సంసర్కులే కారణమని తేలిన విషయం తెలిసిందే. ఇదిలావుంటే ప్రపంచవ్యాప్తంగా మంకీపాక్స్ కేసులు పెరుగుతున్నాయి. దీంతో ఇటీవలే మంకీపాక్స్‌ను గ్లోబల్ ఎమర్జెన్సీగా ప్రకటించిన ప్రపంచ ఆరోగ్య సంస్థ.. తాజాగా మరో కీలక సూచన చేసింది. ఈ వైరస్ ఎక్కువ స్వలింగ సంపర్కం వల్ల వ్యాప్తి చెందుతుండటంతో.. లైంగిక భాగస్వాములను తగ్గించుకోవాలని డబ్ల్యూహెచ్‌వో సూచించింది. మంకీపాక్స్ బారి నుంచి కాపాడుకోవడానికి ఇదే ఉత్తమ మార్గమని డబ్ల్యూహెచ్‌వో చీఫ్ ట్రెడోస్ అదనమ్ ఘెబ్రియేసస్ ప్రకటించారు.

‘సాటి పురుషులతో శృంగారంలో పాల్గొనే మగవాళ్లు కొంత కాలం లైంగిక భాగస్వాములను తగ్గించుకోవాలి. కొత్త భాగస్వాములతో లైంగిక ప్రక్రియలో పాల్గొనే విషయాన్ని పునరాలోచించుకోవాలి. కాంటాక్ట్ వివరాలను నూతన భాగస్వాములతో ఇచ్చి పుచ్చుకోవడం వల్ల అవసరమైతే ఫాలో అప్ చేయడానికి వీలవుతుంద’ని ట్రెడోస్ అభిప్రాయపడ్డారు.

మే నెలారంభం నుంచి మంకీపాక్స్ కేసులు పెరుగుతున్నాయి. బుధవారం నాటికి ప్రపంచవ్యాప్తంగా 78 దేశాల్లో 18 వేలకుపైగా మంకీపాక్స్ కేసులు నమోదయ్యాయి. ఇందులో 70 శాతం కేసులు యూరప్‌లో నమోదు కాగా.. 25 శాతం కేసులు అమెరికాలో నమోదయ్యాయి. మే నెల నుంచి మంకీపాక్స్ బారిన పడి ఐదుగురు ప్రాణాలు కోల్పోయారు. ఇన్ఫెక్షన్ బారిన పడిన వారిలో 10 శాతం మంది హాస్పిటల్‌లో చేరాల్సి వచ్చింది.

ఎవరికైనా మంకీపాక్స్ సోకే అవకాశం ఉండగా.. ఇప్పటి వరకూ నమోదైన కేసుల్లో 98 శాతం స్వలింగ సంపర్కంలో పాల్గొన్న పురుషులవే కావడం గమనార్హం. గత వారం న్యూ ఇంగ్లాండ్ జర్నల్ ఆఫ్ మెడిసిన్‌లో ప్రచురితమైన అధ్యయనంలో ఈ విషయాలను వెల్లడించారు. 98 శాతం గే, బైసెక్సువల్ పురుషుల్లో గుర్తించారని.. 95 శాతం కేసులు లైంగిక ప్రక్రియ ద్వారా వ్యాప్తి చెందాయని ఆ అధ్యయనం వెల్లడించింది.

ఈ ఇన్ఫెక్షన్ బారిన పడిన వారిలో శరీరంపై దద్దుర్లు వస్తాయి. ముఖ్యంగా సన్నిహితంగా మెలిగినప్పుడు, శారీరకంగా తాకినప్పుడు ఇది వ్యాప్తి చెందుతుందని నిపుణులు చెబుతున్నారు. మంకీపాక్స్ లైంగిక ప్రక్రియ ద్వారా వ్యాప్తి చెందుతుందని ఇప్పటి వరకూ గుర్తించలేదు. స్కిన్ టు స్కిన్ కాంటాక్ట్ ద్వారా, మంకీపాక్స్ సోకిన వ్యక్తి నుంచి పడిన బిందువులతో కలుషితమైన మంచం, టవళ్లు, ఇతర వస్తువులను తాకడం ద్వారా కూడా ఈ ఇన్ఫెక్షన్ వ్యాప్తి చెందుతుందని నిపుణులు చెబుతున్నారు.

కరోనా తరహాలో మంకీపాక్స్‌ నుంచి రక్షణగా అందరూ వ్యాక్సిన్లు వేయించుకోవాలని ఇప్పటికైతే తాము సూచించడం లేదని డబ్ల్యూహెచ్‌వో చీఫ్ తెలిపారు. స్మాల్ పాక్స్ కోసం రూపొందించిన వ్యాక్సిన్లు అదే తరహా వైరస్ అయిన మంకీపాక్స్‌ నుంచి రక్షణ కల్పిస్తున్నాయని.. కానీ ఆ వ్యాక్సిన్ల సరఫరా తక్కువగా ఉందని ప్రపంచ ఆరోగ్య సంస్థ తెలిపింది. ఈ వ్యాక్సిన్లు మంకీపాక్స్ నుంచి తక్షణ రక్షణ ఇవ్వలేవని.. కొన్ని వారాల సమయం పడుతుందని డబ్ల్యూహెచ్‌వో తెలిపింది.