అసోంలో 11 మంది టెర్రరిస్టుల అరెస్ట్

అసోం రాష్ట్రంలో 11 మంది టెర్రరిస్టులను పోలీసులు అరెస్ట్ చేశారు. మదర్సా ముసుగులో ఉగ్రవాద కార్యకలాపాలను ప్రోత్సహించడంతో పాటు అల్ ఖైదా, బంగ్లాదేశ్ ఉగ్రవాద సంస్థలతో సంబంధాలున్నాయన్న ఆరోపణలతో అసోంలో 11 మంది టెర్రరిస్టులను అరెస్ట్ చేశారు. మోరిగావ్‌కు చెందిన ముస్తఫా కీలక నిందితుడిగా పోలీసులు చెబుతున్నారు. ఇతనికి ముఖ్యంగా బంగ్లాదేశ్ అన్సరుల్లా టీమ్‌తో సంబంధాలు ఉన్నాయని.. మదర్సా ముసుగులో టెర్రరిస్ట్ సంస్థలకు నిధులు చేరవేస్తున్నాడని పోలీసులు వివరించారు.

అసోంలోని మోరిగావ్, బార్‌పేట జిల్లాల నుంచి ఒకేసారి అల్ ఖైదా, అన్సరుల్లా బంగ్లా టీంతో సంబంధాలున్న వాళ్లని అరెస్ట్ చేసినట్లు పోలీసులు తెలిపారు. ఈ సందర్భంగా అసోం ముఖ్యమంత్రి హిమంత బిశ్వ శర్మ మాట్లాడుతూ.. " మేము అసోంలోని బార్‌పేట, మోరిగావ్ జిల్లాల్లో రెండు జిహాదీ మాడ్యూల్స్‌ను పట్టుకున్నాము. వీళ్లతో సంబంధాలున్న వారినీ అదుపులోకి తీసుకున్నాము. దేశంలో ఎక్కడెక్కడ టెర్రరిస్ట్ అటాక్‌లు ప్లాన్ చేశారనే సమాచారం వీళ్ల నుంచి తెలుసుకునే పనిలో ఎన్ఐఏ ఉంది" అంటూ మీడియాకు వివరించారు.

పోలీసు ఉన్నతాధికారులు మాట్లాడుతూ.. అరెస్టయిన వారందరికీ ప్రపంచ ఉగ్రవాద సంస్థలతో సంబంధాలు ఉన్నాయని.. ఈ విషయంలో చట్ట ప్రకారం తదుపరి చర్యలు తీసుకుంటామని వివరించారు. ప్రధాన నిందితుడు ముస్తఫా అలియాస్ ముఫ్తీ ముస్తఫాది మోరిగావ్ జిల్లాలోని సహారియా గ్రామమని.. అన్సరుల్లా బంగ్లా టీమ్‌తో ఇతనికి ముఖ్యమైన లింక్ ఉన్నట్లు తెలిపారు. మాడ్యూల్‌కి ఆర్థిక సహాయం అందించేందుకు మదర్సాను నడుపుతున్నాడని.. ప్రస్తుతం మదర్సాను సీజ్ చేసినట్లు పేర్కొన్నారు.

ఈ దాడుల్లో టెర్రరిస్టుల నుంచి పలు ఎలక్ట్రానిక్ పరికరాలు, కొన్ని కీలక పత్రాలను స్వాధీనం చేసుకున్నట్లు పోలీసులు తెలిపారు. దేశ వ్యాప్తంగా వీరికున్న లింకులు తెలుసుకునేందుకు తదుపరి విచారణ కొనసాగుతుందని వివరించారు. ముస్తఫాతో పాటు అఫ్సరుల్లా భుయాన్, అబ్బాస్ అలీ, మెహబూబుర్ రెహమాన్, జుబైర్ ఖాన్, రఫీకుల్ ఇస్లాం, దేవాన్ హమీదుల్ ఇస్లాం, మెయినుల్ హక్, కాజీబుర్ హుస్సేన్, ముజిబౌర్ రెహమాన్, షాహనూర్ అస్లాం, సహజహాన్ అలీని అరెస్ట్ చేసినట్లు పోలీసులు మీడియాకు వివరించారు.