స్కూళ్లులో విద్యార్థినీల వింత ప్రవర్త...పూజలు చేయించాలని తల్లిదండ్రుల డిమాండ్

మనిషి కాస్త వింతగా ప్రవర్తిస్తే ఏ దయ్యమో పట్టిందన్నది మనదేశంలో ఇట్టే నమ్మే మూడాచారం.  ఇలాంటి ఘటనే ఉత్తరాఖండ్ లో చోటుచేసుకొంది. ఓ స్కూల్లో విద్యార్థులు వింతగా ప్రవర్తిస్తున్నారు. బోరున ఏడుస్తున్నారు. గట్టిగా అరుస్తున్నారు. తలలు బాదుకుంటున్నారు. కిందపడి దొర్లుతున్నారు. ఉత్తరాఖండ్‌లోని బాగేశ్వర్ జిల్లాలోని రైఖిలి గ్రామంలోని ప్రభుత్వ పాఠశాలలో చాలామంది విద్యార్థులు ఎక్కువగా బాలికలు ఇలా అసాధారణంగా ప్రవర్తిస్తున్నారు. పిల్లలు ఇలా ప్రవర్తించడంతో పాఠశాల అధికారులతో పాటు తల్లిదండ్రులు ఆందోళనకు గురవుతున్నారు.

మంగళవారం మొదటిసారిగా విద్యార్థుల్లో ప్రవర్తనలు తేడా గమనించామని స్కూల్ ప్రధాన ఉపాధ్యాయురాలు విమ్లా దేవి చెప్పారు. ఎటువంటి కారణం లేకుండానే వారు ఏడుస్తున్నారని, తలలు కొట్టుకుంటున్నారని ఆమె తెలియజేశారు. దాంతో విషయం వారి తల్లిదండ్రులకు తెలియజేశారు. వారు స్థానికంగా ఉండే ఓ పూజారిని పిలిచారని, ఆ రోజు పరిస్థితి అదుపులోకి వచ్చిందన్నారు. అడ్మినిస్ట్రేషన్, డాక్టర్ల బృందం గురువారం పాఠశాలను సందర్శించినప్పుడు విద్యార్థుల్లో అసాధారణ ప్రవర్తన గమనించారని చెప్పారు.

అయితే పాఠశాలలో ఏదో సమస్య ఉందని, స్కూల్లో పూజలు నిర్వహించాలని తల్లిదండ్రులు పట్టుబట్టారు. "పాఠశాల క్యాంపస్‌లో పూజలు నిర్వహించాలని తల్లిదండ్రులు పట్టుబట్టారు. లేదంటే పాఠశాల నాశనమవుతుందని వారు నమ్ముతున్నారు. అయితే వైద్యులను సంప్రదించి మేము ఏదైనా చేస్తాం. పరిస్థితి అదుపులోకి వస్తుంది." అని విమ్లా దేవి చెప్పారు. అయితే విద్యార్థులు ఎందుకు ఇలా ప్రవర్తిస్తున్నారనేదానిపై స్పష్టత లేదు. అయితే ఇది 'మాస్ హిస్టీరియా'గా కనిపిస్తోందని మానసిక వైద్య నిపుణులు అభిప్రాయపడుతున్నారు. అయితే ఇదే స్కూల్లో మూడేళ్ల క్రితం కూడా ఇలా జరిగిందంట. అంతేకాదు అల్మోరా, పితోరాఘర్. చమోలి వంటి పొరుగు జిల్లాల్లోని ప్రభుత్వ పాఠశాలల్లో కూడా మాస్ హిస్టీరియా సంఘటనలు గతంలో జరిగినట్టు స్థానికులు చెబుతున్నారు.

మాస్ హిస్టీరియా అనేది అసాధారణమైనది. వ్యక్తుల్లో కానీ సమూహంలో కానీ అసాధారణమైన ప్రవర్తనలు, ఆలోచనలు, భావాలు కనిపిస్తాయి. నిపుణులు ఎక్కువగా మాస్ హిస్టీరియాని ఒక రకమైన డిజార్డర్ లేదా మానసిక అనారోగ్య స్థితిగా పరిగణిస్తారు. ఇది భావోద్వేగ లేదా మానసిక ఒత్తిడి ద్వారా ప్రేరేపించబడిన శారీరక లక్షణాలను కలిగి ఉంటుంది.