జేఆర్‌డీ టాటాతో తన అనుభావాలు గుర్తుచేసుకొన్న రతన్ టాటా

ప్రతి వ్యక్తి జీవితంపై ఎవరిదో ఒకరి ప్రభావం కచ్చితంగా ఉంటుంది. ఇక ప్రముఖుల విషయంలో ప్రత్యేకించి చెప్పనక్కర్లేదు. టాటా ట్రస్ట్‌లు ఛైర్మన్ రతన్ టాటా భావోద్వేగానికి గురయ్యారు. తన గురువు జేఆర్‌డీ టాటా 118వ జయంతి సందర్భంగా ఆయనతో గడిపిన క్షణాలను తలుచుకుంటూ ఇన్‌స్టాగ్రామ్‌లో ఒక పోస్టు చేశారు. ఇన్‌స్టాగ్రామ్‌లో రతన్ టాటా చేసిన ఈ పోస్టుకి లైకుల వెల్లువ కొనసాగుతోంది. ఎంతో అభిమానంగా జేఆర్‌డీ టాటాను‘జే’అని పిలుచుకునే రతన్ టాటా.. ఆయన దయా హృదయాన్ని గుర్తుకు చేసుకున్నారు.

జేతో కలిసి ఉన్న జీవితాన్ని గుర్తుకు చేసుకున్న రతన్ టాటా.. జే తన జీవితంపై ఎంతో ప్రభావం చూపి, తనని విడిచి పెట్టి వెళ్లిపోయారని భావోద్వేగమయ్యారు. ఇద్దరు మధ్య ఎన్నో విషయాల్లో సారూప్యత ఉండేదని, జేఆర్‌డీ టాటా ఆప్యాయతను, ప్రేమను తాను చాలా మిస్‌ అవుతున్నానని చెప్పారు. జే ప్రస్తుతం మనతో లేకపోయినా.. మున్ముందు కాలంలో ఈ లెజెండ్ మనందరి హృదయాల్లోనే ఉంటారని చెప్పారు. అలాగే ఈ పోస్టులో రతన్ టాటా జేతో కలిసి ఉన్న పిక్చర్‌ను కూడా షేర్ చేశారు. ఈ పోస్టుకి రెండు గంటల్లోనే 190 వేలకు పైగా లైక్స్ వచ్చాయి.

టాటా గ్రూప్‌ను ఏర్పాటు చేసిన ఈ వ్యవస్థాపకుని జయంతి, వర్థంతిని రతన్ టాటా అసలు మర్చిపోరు. ఆయనతో గడిపిన క్షణాలను గుర్తు చేసుకుంటూ ఉంటారు. వ్యక్తిగతంగా, వృత్తి పరంగా తన జీవితంపై జే ఎంతో ప్రభావాన్ని చూపారని రతన్ టాటా చెప్పారు. జే తనకు ఒక స్నేహితుడని, రోల్ మోడల్‌ అని, గురువని పేర్కొన్నారు.

జేఆర్‌డీ టాటా చివరి క్షణాల్లో కూడా తామిద్దరూ కలిసి ఎక్కువ సమయాన్ని గడిపినట్టు 2019లో రతన్ టాటా చెప్పారు. తనను చాలా మిస్ అవుతున్నట్టు తెలిపారు. జే తనకి నేర్పిన పాఠాలకు తానెప్పుడూ ధన్యవాదాలు తెలియజేస్తూ ఉంటానని చెప్పారు. 2019లో రతన్ టాటా చేసిన పోస్టు కూడా బాగా వైరల్ అయింది. రతన్ టాటాకు, జేఆర్‌డీ టాటాకు ఇద్దరికీ ఏవియేషన్ అంటే ఎంతో అభిమానం. ఈ అభిమానంతోనే కష్టాల్లో ఉన్న ఎయిరిండియా కంపెనీని టాటా గ్రూప్ కొనుగోలు చేసింది.