ఇంటర్నేషనల్ బులియన్ ఎక్స్చేంజ్ ను ప్రారంభించిన ప్రధాని

ప్రధాన మంత్రి నరేంద్ర మోదీ భారత్‌లో తొలి ఇంటర్నేషనల్ బులియన్ ఎక్స్చేంజ్ ను సూరత్‌లో లాంచ్ చేశారు. దేశంలో ఇదే తొలి ఇంటర్నేషనల్ బులియన్ ఎక్స్చేంజ్. ఈ ఎక్స్చేంజ్‌ను గుజరాత్‌లోని గిఫ్ట్‌ సిటీలో ఏర్పాటు చేశారు. బంగారానికి ప్రపంచంలో రెండో అతిపెద్ద వినియోగదారి అయిన భారత మార్కెట్లో పారదర్శకతను తీసుకొచ్చేందుకు మోదీ ఈ ఎక్స్చేంజ్‌ను లాంచ్ చేశారు. ఈ సందర్భంగా గుజరాత్ ఇంటర్నేషనల్ ఫైనాన్స్ టెక్-సిటీలో ఉన్న ఎగ్జిబిషన్‌ను తిలకించారు. గత ఎనిమిదేళ్లలో దేశం ఆర్థిక చేరికలో సరికొత్త దశను చేరుకుందని చెప్పారు. పేద ప్రజలు కూడా అధికారిక ఆర్థిక సంస్థలలో భాగమవుతున్నారని చెప్పారు. ఈ సమయంలో ప్రైవేట్, ప్రభుత్వ సంస్థలు కలిసి పనిచేయాల్సినవసరం ఉందన్నారు.

ఇంటర్నేషనల్ బులియన్ ఎక్స్చేంజ్ పలు ప్రొడక్టులను, టెక్నాలజీ సర్వీసులను ఆఫర్ చేస్తుంది. దేశంలో, విదేశాల్లో ఇతర ఎక్స్చేంజ్‌లతో పోలిస్తే ఖర్చు తక్కువగా ఉండనుంది. ఈ బులియన్ ఎక్స్చేంజ్‌లో చిన్న ట్రేడర్లు, జ్యూవెల్లర్లు కూడా బంగారం, సిల్వర్ ట్రేడింగ్‌తో పాటు డెరివేటివ్స్ ట్రేడింగ్‌ను చేపట్టుకోవచ్చు. అయితే ఈ ఎక్స్చేంజ్‌పై అన్ని కాంట్రాక్టులను డాలర్లలోనే లిస్ట్ చేయాలి. డాలర్లలోనే సెటిల్‌మెంట్ చేసుకోవాలి.

భారత్‌లో బంగార నియంత్రణ చాలా గట్టిగా ఉంటుంది. కేవలం ఆర్‌బీఐ అనుమతిచ్చిన బ్యాంకులు, ఏజెన్సీలు మాత్రమే బంగారాన్ని దిగుమతి చేసి, డీలర్లకు, జ్యూవెల్లర్లకు అమ్మడం చేస్తుంటాయి. కానీ ఐఐబీఎక్స్ అనేది టెక్నాలజీ ఆధారిత ప్లాట్‌ఫామ్. ఇది భారత బులియన్ మార్కెట్‌లో మరింత అధికారిక విధానాన్ని తీసుకొస్తుంది. అర్హులైన జ్యూవెల్లర్లు నేరుగా ఈ ఎక్స్చేంజ్ మెకానిజం ద్వారా బంగారాన్ని దిగుమతి చేసుకునే అవకాశం పొందుతారు. 2021లో భారత్ 1,069 టన్నుల బంగారాన్ని దిగుమతి చేసకుంది.

మల్టి కమోడిటీ ఎక్స్చేంజ్(ఎంసీఎక్స్), నేషనల్ కమోడిటీ అండ్ డెరివేటివ్స్ ఎక్స్చేంజ్(ఎన్‌సీడీఈఎక్స్)లు భారత్‌లో భారత్ ఫ్యూచర్స్ కాంట్రాక్టులను ఆఫర్ చేస్తాయి. కానీ బంగారాన్ని కొనేందుకు ఎలాంటి ఫిజికల్ ఎక్స్చేంజ్ మాత్రం లేదు. ఈ ఎక్స్చేంజ్ ద్వారా భారత్‌లోకి బంగారం, వెండిని నేరుగా దిగుమతి చేయవచ్చు. బులియన్ ట్రేడింగ్‌కు మార్కెట్ పార్టిసిపెంట్లన్నింటికి పారదర్శకమైన ప్లాట్‌ఫామ్‌గా ఇది ఉంటుంది. ఇది ధరల్లో సాయపడుతుంది. దీంతో పాటు క్వాలిటీ గోల్డ్‌కి కూడా ఇది హామీ ఇస్తుంది.