నాడు చనిపోయిన వారికి నేడు పెళ్లి

మనదేశం భిన్నత్వంలో ఏకత్వం ఎందుకన్నారో తెలుసా...మన దేశంలో భిన్న మతాలు, కులాల వారు ఉండటమే కాదు ఒక్కో ప్రదేశంలో ఒక్కో సంప్రదాయం ఉంది. ఇప్పుడు మారుతున్న కాలంలో కొన్ని కొన్ని కనుమరుగు అవుతున్నా.. కొన్ని చోట్ల ఇంకా ఆ పాత పద్ధతులు పాటిస్తూ.. సంబరాలు చేసుకుంటూ సంతోషంగా ఉంటున్నారు. ఇక్కడ మనకో నెటిజన్ ట్విటర్‌లో పోస్ట్ చేసిన వీడియోలు తెలియని, ఆశ్చర్యానికి గురిచేసే సంప్రదాయాన్ని పరిచయం చేశాడు. అతనికి కూడా ఆ అనుభవం మొదటి సారే అంటా.. అందుకే ఆ అనుభవాన్ని మనతో ఇలా పంచుకున్నాడు..

"ఈ మధ్య కాలంలో నేకొక పెళ్లికి వెళ్లాను. మామూలు పెళ్లయితే నేను ఇలా ప్రత్యేకంగా దాని గురించి నెట్టింట్లో చర్చించాల్సిన అవసరం లేదు. ఇక్కడ జరిగిన పెళ్లిలో పెళ్లి కుమారుడు, పెళ్లి కుమార్తె 30 ఏళ్ల కిందటే చనిపోయారు. కానీ, వాళ్లకి ఇప్పుడు పెళ్లి జరిగింది. దక్షిణ కన్నడ ప్రాంతంలో ఇది సంప్రదాయంగా వస్తుంది. మీ అందరికీ ఇది వినడానికి ఆశ్చర్యంగానే ఉన్నా ఇది నిజం" అంటూ మంగళూరులో జరిగిని వింత పెళ్లి వీడియోలను పోస్ట్ చేశాడు.

పురిటిలో చనిపోయిన పిల్లల ఆత్మలు సంతోషంగా ఉండాలనే ఉద్దేశంతో దక్షిణ కర్ణాటకలోని ప్రజలు వారికి వివాహ తంతు నడిపిస్తారు. ఏదో తూతూ మంత్రంగా కాదు.. పట్టువస్త్రాలు, కన్యాదానం, ఏడడుగులు అంతా సంప్రదాయబద్ధంగానే ఇది సాగుతుంది. పెళ్లికి వచ్చిన వారికి రుచికరమైన వంటలు కూడా వడ్డిస్తారంటేనే అర్థం చేసుకోవచ్చు ఆ వివాహం ఎంత వైభవంగా సాగుతుందో చూడండి అంటూ పోస్ట్ చేసిన వీడియోలకు నెటిజన్ల నుంచి ఊహించని రెస్పాన్స్ వచ్చింది.

"అషామాషీగా అయితే పెళ్లి జరిపించరు.. అమ్మాయి, అబ్బాయి ఇష్టపడాలి. అన్నీ కుదరాలి కూడా. మొన్నామధ్య అబ్బాయి కంటే అమ్మాయి కాస్త పెద్దదన్న కారణంతో పెళ్లి రిజక్ట్ చేశారు. పెళ్లికి ముందు అమ్మాయి, అబ్బాయిని పట్టు వస్త్రాలతో అలంకరించి.. పెద్దల అందరి ఆశీర్వాదం తీసుకొని.. ఏడడుగులు వేస్తారు. కన్యాదానం, మాంగళ్యధారణ తర్వాత అందరూ అక్షింతలు వేస్తారు. మళ్లీ చిన్న పిల్లలు వాళ్లని ఆశీర్వదించడానికి లేదండి. తమ బిడ్డలు మరణాంతరం కూడా సుఖంగా ఉండాలని ఇలా చేస్తారు. ఇంతకీ వధూవరుల పేర్లేంటంటే..? శోభ, చండప్ప" అని ఓ మంచి అనుభూతిని అరుణ్ అనే అతను నెటిజన్లతో పంచుకున్నాడు.