వింత దొంగలు...ఆ వస్తువులనే ఎత్తుకెళ్లారు

దొంగలంటే భారీ ఎత్తున చేతివాటం ప్రదర్శిస్తారు. కానీ ఆ దొంగలు మాత్రం తమ అవసరాలకు అవసరమైనవే చోరీ చేశారు.  చోరీ అంటే బంగారం, డబ్బులు కొట్టేస్తారు. లేదా విలువైన వస్తువులను పట్టుకెళ్లిపోతారు. కానీ పంజాబ్‌లో జరిగిన దొంగతనం చాలా వింతగా ఉంది. డబ్బులు జోలికి వెళ్లలేదు. బంగారం ఊసే లేదు. దొంగలు విచిత్రంగా ట్యాప్‌లు, వాటర్ కూలర్లు, డోర్లు, వైర్లు ఎత్తుకెళ్లారు. ఈ వింత చోరీ పంజాబ్ యూనివర్సిటీ హాస్టల్లో జరిగింది. హాస్టల్ నెంబర్ 11‌లో దొంగతనం జరిగింది. ఓ కాంట్రాక్టర్ ఆ భవనాన్ని ఇటీవలె నిర్మించి యూనివర్సిటీకి అందజేశారు. ఆ భవనంలో వందలాది సంఖ్యలో వాటర్ ట్యాప్‌లు, ఒక వాటర్ కూలర్, 22 డోర్లు, కిటికీలు, భారీ విద్యుత్ వైర్లను ఎత్తుకెళ్లారు.

అయితే రెండు రోజుల క్రితం యూనివర్సిటీలోని సివిల్ ఇంజనీరింగ్ వింగ్ ఉద్యోగులు మౌలిక సదుపాయాలను పరిశీలించడానికి భవనం లోపలికి వెళ్లినప్పుడు దొంగతనం జరిగినట్టు తెలిసింది. హాస్టల్‌ గదులు, వాష్‌రూమ్‌లు, వంటశాలల్లో వందలాది కుళాయిలు కనిపించకుండా పోయాయి. వాటర్ కూలర్ కూడా కనిపించలేదు. దాంతో పంజాబ్ యూనివర్సిటీ (పీయూ) అధికారులు పోలీసులకు ఫిర్యాదు చేశారు.

దొంగలు హాస్టల్‌లోని కిటికీలు, తలుపుల అద్దాలు పగులగొట్టి లోపలికి ప్రవేశించి.. చోరీకి పాల్పడ్డారు. ఆ వస్తువులను ఉంచిన భవనంలోని మొదటి, రెండో అంతస్తుల్లో చోరీ జరిగిందని, అందులో సీసీ కెమెరాలు లేవని పంజాబ్ యూనివర్సిటీ సిబ్బంది చెప్పారు. చాలా తలుపులు, కిటికీలు పగిలిపోయి ఉన్నాయన్నారు. ఈ మేరకు తాము స్థానిక పోలీసులకు ఫిర్యాదు చేశామని, ఈ మేరకు స్థానిక పోలీస సిబ్బంది హాస్టల్‌ను పరిశీలించారని పీయూ సెక్యూరిటీ ఇన్‌ఛార్జ్ విక్రమ్ సింగ్ చెప్పారు. అలాగే ప్రస్తుతం హాస్టల్ ఖాళీగా ఉందని, ఈ విషయాన్ని పరిశీలిస్తున్నామని పోలీసు అధికారి జస్బీర్ సింగ్ తెలిపారు. అయితే చోరీకి గురైన వైర్లు, ట్యాప్‌లు, ఇతర వస్తువుల విలువ లక్షల్లో ఉంటుందని హాస్టల్ సిబ్బంది అంటున్నారు.