భార్య హత్య..భర్త ఆత్మహత్యకు కారణమైన చికెన్ కబాబ్

ఆవేశంలో చేసే పనులు  జీవితాలను నాశనం చేస్తుంటాయి. తాజాగా ఇలాంటి ఘటనే కర్ణాటక రాష్ట్రంలో చోటు చేసుకొంది. చికెన్ కబాబ్ విషయంలో తలెత్తిన వివాదం ఏకంగా భర్త మరణానికి దారితీసింది. సాయంత్రం పని ముగించుకుని.. దారిలో మద్యం తీసుకొని ఇంటికొచ్చిన భర్తకి చికెన్ కబాబ్ రుచిగా చేయలేదన్న చిన్న గొడవ చిలికి చిలికి గాలివానలా మారింది. ఈ గొడవలో భార్యపై కత్తితో దాడి చేసిన భర్త.. ఆ తర్వాత చుట్టుపక్కల వాళ్లు వస్తున్నారన్న భయంతో పరారై రెండ్రోజుల తర్వాత శవమై తేలాడు. ఈ ఘటన కర్ణాటకలో చోటుచేసుకుంది.

బెంగళూరు బన్నెరుఘట్ట పోలీస్ స్టేషన్ పరిధిలోని ఆరెకెరె లే అవుట్‌లో ఉంటున్న సురేష్ (48).. బొమ్మనహళ్లికి చెందిన గార్మెంట్ ఫ్యాక్టరీలో పనిచేస్తున్నాడు. బుధవారం రాత్రి పని ముగించుకుని ఇంటికి వచ్చాడు. ఇంట్లో తాగేందుకు మద్యం తీసుకొచ్చిన సురేష్.. స్టఫ్ కోసం భార్య షాలినిని కబాబ్ చేయాలని కోరాడు. దానికి భార్య కూడా సరే అని చెప్పి కబాబ్ చేసి తీసుకొని వచ్చింది. అయితే, కబాబ్‌లు తిన్న సురేష్ అవి రుచిగా లేవంటూ భార్యపై కోప్పడ్డాడు.

భార్యభర్తల మధ్య మాటా మాటా పెరగడంతో సురేష్ కత్తి తీసుకుని భార్య షాలిని చేతులపై విచక్షణా రహితంగా దాడి చేశారు. దాంతో షాలినీ కేకలు వేయడంతో భయపడిన సురేష్ అక్కడి నుంచి పారిపోయాడు. చుట్టుపక్కల వాళ్లు వెంటనే అక్కడికి చేరుకుని బాధితురాలిని ఓ ప్రైవేట్ ఆస్పత్రిలో చేర్పించారు. దీనిపై కేసు నమోదు చేసిన పోలీసులు పరారీలో ఉన్న సురేష్ కోసం వెతుకుతుండగా.. రెండ్రోజుల తర్వాత నిర్మానుష్య ప్రాంతంలో చెట్టు కొమ్మకు ఉరేసుకుని కనిపించాడని పోలీసులు తెలిపారు.