భూ వివాదాల కోసం...ప్రతి మండల కేంద్రంలో ట్రైబ్యునల్‌

ఏపీలోని వైసీపీ ప్రభుత్వం ఓ చారిత్రాత్మక నిర్ణయం తీసుకొంది. వైఎస్ జగన్ తాజాగా సమగ్ర సర్వేపై సమీక్ష నిర్వహించారు. భూ వివాదాల పరిష్కారం కోసం మరో కీలక నిర్ణయం తీసుకున్నారు. జగనన్న భూ రక్ష భూ హక్కు కింద సమగ్ర సర్వే ముగిశాక కూడా ట్రైబ్యునళ్లు కొనసాగనున్నాయి. ప్రతి మండల కేంద్రంలో భూ వివాదాల పరిష్కారంకోసం ట్రైబ్యునల్‌ ఏర్పాటు చేస్తున్నారు. శాశ్వత ప్రాతిపదికన టైబ్యునళ్లు పనిచేయనున్నాయి. సమగ్ర సర్వేపై సమీక్ష సందర్భంగా సీఎం వైఎస్ జగన్‌ ఆదేశాలు ఇచ్చారు. సర్వే సందర్భంగా కూడా తలెత్తే వివాదాల పరిష్కారానికి.. సరైన యంత్రాంగం ఉండాలని ఆదేశించారు. మొబైల్‌ ట్రైబ్యునల్‌ యూనిట్లు ఉండాలన్న సీఎం.. దీనిపై సమగ్ర కార్యాచరణ రూపొందించాలన్నారు. భూ వివాదాల పరిష్కారంపై రాష్ట్రంలో అత్యుత్తమ వ్యవస్థను తీసుకురావాలన్నారు.

రాష్ట్రవ్యాప్తంగా ప్రతిష్టాత్మకంగా చేపట్టిన భూముల రీ సర్వే కార్యక్రమం వేగవంతం అవుతోంది. ఇప్పటి వరకు దాదాపు వెయ్యి గ్రామాల్లో రీ సర్వే పూర్తికాగా.. మరో వెయ్యి గ్రామాల్లో అక్టోబర్‌ నాటికి రీ సర్వే పూర్తి చేసే దిశగా అడుగులు వేస్తోంది. డ్రోన్ల సాయంతో భూములను కొలిచి.. వాటి చిత్రాలు జారీ చేసిన తర్వాతే సర్వే బృందాలు ముందుకు వెళుతున్నాయి. రైతుల సమక్షంలో క్షేత్ర స్థాయి నిజనిర్థారణ చేస్తున్నాయి. సర్వే పూర్తయ్యాక భూ యజమానుల నుంచి వచ్చే అభ్యంతరాలను పరిష్కరిస్తున్నారు. రీసర్వే పూర్తయ్యాక తర్వాత తయారు చేసే కొత్త రెవెన్యూ రికార్డుల రూపకల్పనలో ఈ సవరణలు ఉపయోగపడతాయని రెవెన్యూ అధికారులు అంటున్నారు. ముఖ్యమంత్రి వైఎస్‌ జగన్‌ కూడా రీ సర్వే కార్యక్రమంపై ఎప్పటికప్పుడు సమీక్షలు చేస్తున్నారు.